Qazaqstan quramasy geografııadan halyqaralyq olımpıadada ekinshi oryn aldy
ASTANA. KAZINFORM – Qazaqstan ulttyq quramasy IGeO 2026 halyqaralyq geografııa olımpıadasynda 2 altyn jáne 2 kúmis medal jeńip alyp, jalpy komandalyq esepte ekinshi orynǵa ıe boldy. Bul týraly Oqý-aǵartý mınıstrligi habarlady.
Qostanaı qalasyndaǵy fızıka-matematıka baǵytyndaǵy NIS-tiń 11-synyp oqýshysy Andreı Enbahtov altyn medal jeńip alyp, jeke esepte absolıýtti chempıon atandy. Ol osymen ekinshi jyl qatarynan IGeO olımpıadasynyń altyn medalin ıelenip otyr.
Jetisý oblysyndaǵy Muhtar Aryn atyndaǵy №24 mamandandyrylǵan lıtseıdiń 10-synyp oqýshysy Bekbol Daryn altyn medal jeńip alyp, jeke esepte 9-orynǵa turaqtady.
Shyǵys Qazaqstan oblysyndaǵy daryndy balalarǵa arnalǵan mamandandyrylǵan «Bilim-ınnovatsııa» lıtseı-ınternatynyń 11-synyp oqýshylary Amır Darynov pen Alan Kozlenko kúmis medal ıelendi. Osylaısha, Qazaqstan quramasynyń barlyq tórt múshesi de halyqaralyq olımpıadanyń júldegeri atandy.
Olımpıada 11-17 tamyz aralyǵynda Túrkııanyń Ystambul qalasynda ótti. Oǵan ulttyq irikteý kezeńderinen ótken 50 eldiń 184 oqýshysy qatysty.
Qazaqstan quramasyna respýblıkalyq jáne halyqaralyq olımpıadalardyń birneshe dúrkin júldegeri Abaı Dúısen men NU stýdenti Almas Iskendırov jetekshilik etti.
Qazaqstan halyqaralyq geografııa olımpıadasyna 2012 jyldan beri qatysyp keledi. Osy ýaqyt aralyǵynda qazaqstandyq oqýshylar 7 altyn, 6 kúmis jáne 7 qola medal jeńip aldy.
Qazaqstan oqýshylary ótken oqý jylynda halyqaralyq olımpıadalarda 1 059 medal jeńip aldy. Bul týraly Úkimet otyrysynda Oqý-aǵartý mınıstri Juldyz Súleımenova aıtty.
