Qazaqstan quramasy fýtboldan joldastyq kezdesýde Kıýrasaony jeńdi
ASTANA. KAZINFORM - Fýtboldan Qazaqstan ulttyq quramasy joldastyq kezdesýde Kıýrasaony jeńdi.
Eki taraptyń kelisimi boıynsha match jabyq túrde ótti.
FIFA reıtınginde Kıýrasao quramasy 91-orynda tur. Olarǵa áıgili nıderlandtyq maman Dık Advokat jetekshilik etedi.
Oıynnyń 15-mınýtynda Maksım Samorodov esep ashsa, 36-mınýtta Ashat Taǵybergen aıyp soqqysymen esepti eseledi.
Ekinshi kezeńde qarsylastar bir-biriniń qaqpasynan sańylaý taba alǵan joq. Osylaısha Qazaqstan quramasy qarsylasynan 2:0 esebimen basym tústi.
Endi qazaqstandyq fýtbolshylar 2026 jylǵy álem chempıonaty irikteý satysynda aldaǵy eki oıynyn ótkizedi. Aldymen Qazaqstan quramasy 22 naýryzda syrt alańda Ýelspen kezdesse, 25 naýryzda Lıhtenshteınge qarsy oınaıdy.
2026 jylǵy álem chempıonaty irikteý satysynda Qazaqstan quramasy J tobynda synǵa túsedi. Qarsylastary — Belgııa, Ýels, Soltústik Makedonııa jáne Lıhtenshteın.
Matchtar 2025 jyldyń naýryzynda bastalyp, qarasha aıynda aıaqtalady.