Qazaqstan quramasy áskerıler arasynda qazaq kúresinen álem chempıony atandy
ASTANA. KAZINFORM — Qazaqstan jeńil atletıka kesheninde áskerı qyzmetshiler arasynda qazaq kúresinen I álem chempıonatynyń jabylý saltanaty ótti. Bul týraly Qorǵanys mınıstrligi málim etti.
Halyqaralyq áskerı sport keńesiniń (Conseil International du Sport Militaire) qoldaýymen ótken aýqymdy sporttyq týrnır Keńes Odaǵynyń Batyry Álııa Moldaǵulovaǵa arnaldy.
Jabylý saltanatyna Qorǵanys mınıstri avıatsııa general-leıtenanty Dáýren Qosanov, CISM Prezıdenti Brazılııa armııasynyń polkovnıgi Rolım Fılo Nılton Gomes, sheteldik delegatsııalardyń ókilderi, qazaqstandyq sport ardagerleri jáne Qarýly kúshterdiń áskerı qyzmetshileri qatysty. CISM basshylyǵyna, tóreshilerge, jattyqtyrýshylarǵa, eriktiler men demeýshilerge joǵary daıyndyq deńgeıi úshin alǵysyn bildirgen Qazaqstan Qorǵanys mınıstri sportshylardy álem birinshiliginiń aıaqtalýymen quttyqtap, zor densaýlyq, jańa jeńister men qyzmette jetistikter tiledi.
– Qazaq kúresi – ǵasyrlar boıy urpaqtan urpaqqa jalǵasyp kele jatqan halqymyzdyń asyl murasy. Onyń negizgi máni – ádilettilik, tabandylyq, maqsatqa umtylýshylyq jáne tózimdilik. Búgingi jarysta balýandar shynaıy sporttyq rýh pen naǵyz sheberlikti kórsetti. Álem chempıonaty tek sporttyq jarystyń ǵana emes, sonymen qatar dostyqtyń, ózara qurmet pen halyqaralyq áskerı yntymaqtastyqty nyǵaıtýdyń alańyna aınaldy, – dep atap ótti qorǵanys vedomstvosynyń basshysy avıatsııa general-leıtenanty Dáýren Qosanov.
Alǵashqy jekpe-jekter otandyq ulttyq sport mektebiniń artyqshylyǵyn kórsetti. Álem chempıonatynyń qorytyndysy boıynsha jalpy komandalyq esepte birinshi oryndy Qazaqstan quramasy, ekinshi oryndy Ózbekstan komandasy, úshinshi oryndy Reseı aldy. Jabylý saltanatynda CISM Prezıdenti polkovnık Rolım Fılo Nılton Gomes sóz sóılep, jarystyń joǵary deńgeıde uıymdastyrylǵanyn jáne sportshylardyń tamasha daıyndyǵyn atap ótti.
– Álem elderi kóshpendilerdiń dástúrleri men qazaq kúresiniń ulttyq sport túri qandaı ekenin kórdi. Buryn jaýyngerlerdiń jekpe-jek óneri olardyń ómir salty boldy. Bul sport álemniń barlyq elderiniń áskerı qyzmetshilerine tán tózimdilik, taktıkalyq sheberlik, joǵary ıntellekt ján abyroı syndy qundylyqtar men qasıetterdi qamtıdy. Qazaq kúresiniń bolashaǵy zor ekenine senimdimin, – dedi ol.
Erler arasynda Qazaqstan balýandary Bekjan Tólepov (55 keli), Ernur Súleımen (60 keli), Saǵyndyq Áshim (66 keli), Jumajan Qojambekov (74 keli) jáne Ǵalymjan Qyryqbaı (100 keliden joǵary), reseılik balýandar Gleb Golov (82 keli) jáne Vladımır Dosıak (100 keli), Ózbekstannan kelgen Omar Bozorov (90 keli) chempıon atandy. Áıelder arasynda jeńiske jetkender – qazaqstandyq sportshylar Aıjan Jylqybaeva (48 keli), Raýza Nurmuhametova (56 keli) jáne Aqerke Ramazanova (77 keliden joǵary), Ózbekstannan kelgen Sıtor Ilmýrodova (52 keli) jáne Shahnoza Bozorova (77 keli), Reseı quramasynyń ókilderi Valentına Ostapets (60 keli) jáne Darıa Kýzmıcheva (65 keli) . Qazaq kúresinen CISM álem chempıonatynyń qorytyndysy boıynsha qazaqstandyq sportshylar tartysqa toly saıysta 8 altyn, 6 kúmis jáne 2 qola medal oljalady.
Buǵan deıin habarlanǵandaı, qazaq kúresinen álem chempıonatynda áskerı qyzmetshileri 4 altyn medal jeńip aldy.