Qazaqstan quramasy alǵash ret fızıka olımpıadasynda bes altyn jeńip aldy
ASTANA. KAZINFORM – Almaty halyqaralyq áýejaıynda 56-shy Halyqaralyq fızıka olımpıadasynyń (IPhO-2026) jeńimpazdaryn saltanatty qarsy alý rásimi ótti. Qazaqstan quramasy óz tarıhynda alǵash ret bes altyn medal jeńip alyp, rekordtyq nátıjege qol jetkizdi, dep habarlaıdy Oqý-aǵartý mınıstrligi.
Saltanatty rásimge Oqý-aǵartý mınıstri Juldyz Súleımenova qatysyp, oqýshylardy tarıhı jetistikterimen quttyqtady. Sonymen qatar ulttyq quramany daıyndaýǵa atsalysqan pedagogter men tálimgerlerge alǵys bildirdi.
– Bul jetistik – qazaqstandyq oqýshylardyń joǵary daıyndyq deńgeıi men pedagogterdiń kásibıliginiń aıqyn dáleli. Sondaı-aq Memleket basshysynyń daryndy jastardy qoldaý jáne bilim berý júıesin damytý jónindegi tapsyrmalarynyń nátıjesin kórsetedi, – dep atap ótti mınıstrlik.
Saltanatty kezdesýdiń basty keıipkerleri – altyn medal ıegerleri Nurgúl Egenbergenova, Ámirbek Azatbekov, Іlııas Qazymbek, Roman Cheremnov jáne Damır Qurman boldy. Olarmen birge elge ulttyq quramanyń jetekshisi Gúlııa Nurbaqova jáne komanda jetekshileri Samat Maqsutov pen Álisher Erkebaev oraldy.
56-shy Halyqaralyq fızıka olımpıadasy 4–12 shilde aralyǵynda Kolýmbııanyń Býkaramanga qalasynda ótti. Bedeldi bilim dodasyna álemniń 85 elinen 381 oqýshy qatysqan.
– Qazaqstan quramasynyń bes altyn medal jeńip alýy – elimizdiń zııatkerlik áleýetiniń artyp kele jatqanyn kórsetetin tarıhı nátıje. Bul jeńis jas urpaqqa úlgi bolyp, halyqaralyq bilim arenasyndaǵy Qazaqstannyń bedelin nyǵaıta tústi, – dep málimdedi vedomstvo.
Oqý-aǵartý mınıstrligi jeńimpazdardy, olardyń ustazdary men ata-analaryn tarıhı jetistikpen quttyqtady.
Aıta keteıik, Qazaqstan quramasy hımııadan halyqaralyq olımpıadada el namysyn qorǵap jatyr.
