Qazaqstan kúnbaǵys maıy eksportynan álemde 6-orynǵa shyqty
ASTANA. KAZINFORM – Qazaqstannyń maı óńdeý salasy sońǵy jyldary eksporttaǵy eń qarqyndy damyp kele jatqan baǵyttardyń birine aınaldy. 2025 jyldyń qorytyndysy boıynsha el kúnbaǵys maıyn eksporttaý kóleminen álemde 6-orynǵa kóterilse, Qytaı naryǵynda 2-orynǵa shyqty.
– 2025 jyldyń qorytyndysy boıynsha Qazaqstan kúnbaǵys maıyn eksporttaý boıynsha álemde 6-orynǵa jáne Qytaı naryǵynda 2-orynǵa shyqty. Búginde qazaqstandyq maı ónimderi álemniń 20-dan astam eline eksporttalady. Negizgi naryqtar qatarynda Qytaı, Ortalyq Azııa memleketteri men Eýropalyq odaq elderi bar, – dedi QazTrade basqarýshy dırektory Aınur Ámirbekova.
Sala ókilderiniń málimetinshe, sońǵy eki jylda Qazaqstan Ózbekstan men Tájikstanǵa ósimdik maıyn jetkizýde kóshbasshyǵa aınalǵan. Bul elderdegi ımporttyń 90 paıyzdan astamy qazaqstandyq ónim.
Sonymen qatar elimiz kúnbaǵys shrotymen Ortalyq Azııa naryǵyn tolyq qamtamasyz etip, Eýroodaqqa jetkizýshi negizgi úsh eldiń qataryna engen.
Aıta keteıik, buǵan deıin, elimiz maı-tońmaı ónimderin Qytaıǵa jetkizý kólemin arttyrǵanyn jazǵan edik.
