Qazaqstan kún jáne jel elektr stansalaryn bastan-aıaq óz aýmaǵynda óndirmek
Azııadaǵy ózara is-qımyl jáne senim sharalary keńesiniń iskerlik alqasy aıasynda kún jáne jel elektr stansalaryn bastan-aıaq Qazaqstan aýmaǵynda óndirýdi kózdeıtin jobalar qolǵa alynbaq, dep habarlaıdy Kazinform agenttigi.
Bul jaıynda «Atameken» ulttyq kásipkerler palatasynyń tóralqa tóraǵasy Raıymbek Batalov AÓSShK bıznes forýmynda málim etti
«AÓSShK iskerlik alqasynyń aıasynda jańartylatyn energııamen baılanysty 4 jobany qarap jatyrmyz. ıAǵnı, jańartylatyn energııa kózderimen baılanysty dúnıeniń bárin jergilikti óndiriske shoǵyrlandyrý kózdelip otyr. Mysaly, jel elektr stansasyn alsaq, qapalaǵyn bir elden, munarasyn basqa bir elden ákelip jatady. Tasymal shyǵynynyń ózi ǵana óte joǵary. Bir munaraǵa 100 myń dollardan artyq jumsaıdy. Búgingi tańda osyndaı óndiristerdi jergiliktilendirý baǵytynda 4 jobany qarastyryp jatyrmyz», - dedi ol BAQ ókilderiniń suraǵyna bergen jaýabynda.
Onyń sózinshe, iskerlik alqa aıasynda kún energetıkasynyń óndirisin bastan-aıaq Qazaqstanda shoǵyrlandyrý jobasy da qarastyrylyp otyr.
«Óte qyzyq jobalar. Investıtsııalar túrli eldermen baılanysty. Mundaǵy ár jobanyń quny 20 mln dollardan kem emes. Árqaısysynyń sıpatyna baılanysty. Bul jobalar shyndyqqa jaqyn. ıAǵnı, mıllıardtaǵan ınvestıtsııa týraly aıtyp, keıin aýaǵa aınalatyn jobalardyń qatarynan emes. Ortalyq Azııa elderiniń, Qytaıdyń, Túrkııanyń, Germanııanyń ınvestorlarynan naqty usynystar bar. Onyń bárin jalpy jıyntyqta qarastyryp jatyrmyz. Óıtkeni ár túrli tehnologııalardyń bolǵany bizge utymdy. Uıymǵa múshe elder birlesip qarjylandyrýǵa nıetti. Mundaı jobalardy ınvestıtsııasyz iske asyrý múmkin emes», - dedi Raıymbek Batalov.
