Qazaqstan kúkirt qyshqylynyń tapshylyǵynan qashan qutylady

ASTANA. KAZINFORM — Premer-mınıstr Oljas Bektenov Úkimet otyrysynda eldegi kúkirt qyshqylynyń tapshylyǵyna alańdaýshylyq bildirdi. 

— Bizde birneshe jyl boıy kúkirt qyshqyly tapshylyǵy baıqalyp otyr. Máseleni qalaı sheshemiz, — dep surady Oljas Bektenov Ónerkásip jáne qurylys mınıstri Ersaıyn Naǵaspaevtan.

Mınıstrdiń sózinshe bul máseleni sheshýge keminde 3 jyl kerek.

— Bizde jospar boıynsha aldaǵy jylda «EvroHım-Qarataý» jáne «Taıqońyr» qyshqyl zaýyty iske qosylady. Sonyń nátıjesinde, 1,6 mln tonna kúkirt qyshqyly óndirile bastaıdy. ıAǵnı, 2028 jylǵa deıin Qazaqstannyń ishki suranysy tolyq jabylady, — dedi ol.

Eske salsaq, byltyr jeltoqsanda Atyraý munaı óńdeý zaýytynyń ashyq alańynda kúkirt jınaǵan kompanııaǵa aıyppul salynǵan bolatyn.