Qazaqstan Kýbogynyń 1/8 fınaly: «Qaırat» - «Shahter» 4:0
ALMATY. QazAqparat- Jańa ǵana Almatynyń Ortalyq stadıonynda Qazaqstan Kýbogynyń 1/8 fınaldyq kezeńi aıasynda «Qaırat» fýtbol komandasy men Qaraǵandynyń «Shahter» fýtbol klýbynyń kezdesýi aıaqtaldy. Asa tartysty ótken matchta almatylyqtar qarsylastaryn 4:0 esebimen tize búktirdi.
Komandalar jasyl alańǵa mynadaı quramda shyqqan bolatyn:
«Qaırat» FK: Vladımır Plotnıkov, Ermek Qýantaev, Tımýr Rýdoselskıı, Jarko Markovıch, Lýkash Tesak, Anatolıı Tımoşýk, Mıhaıl Bakaev, Baýyrjan Islamhan, Andreı Arshavın, Isael Barboza, Gael Tavamba.
Zapastaǵylar: Andreı Sıdelnıkov, ıAn Vorogovskıı, Islambek Qýat, Aslan Darabaev, Vıtalıı Lı, Stanıslav Lýnın, Madııar Raıymbek, Dilshat Musaev, Salman Habaev.
«Shahter» FK: ıAroslav Bagınskıı, Kornelıs Ýbbınk, Robert Arzýmanıan, Ivan Sadovnıchıı, Erfan Zenelı, Moshtag ıAgýbı, Evgenıı Gorıachıı, Qýanysh Ermekov, Andreı Fınonchenko, Maqsat Baıjanov, Sergeı Skoryh
Zapastaǵylar: Sergeı Tkachýk, Aıbar Nurlybekov, Grıgorıı Dýbkov, Vladıslav Vasılev, Igor Pıkalkın, Aıdos Táttibaev.
Oıyn bastala salysymen alań ıeleri, jankúıerlerdiń qyzý qoldaýymen oıyn tizginin óz qoldarynda ustap, batyl shabýylǵa kóshti. Negizinen «qaırattyqtar» qarsylastardyń qaqpasyn aıyp alańynyń syrtynan nysanaǵa alýǵa tyrysty. Biraq, bul nátıje bermedi. Qonaqtar da qapysyn taýyp qarymta shabýyl uıymdastyrýǵa tyrysyp baqty.
Bul jerde qaqpashylardyń sheberligin aıta ketken jón. Plotnıkov ta, Bagınskıı de qaqpaǵa tebilgen doptardy darytpady. Sáıkesinshe, birinshi taımda esep ashylmady.
Ekinshi taımda alań ıeleri qarsylastarǵa qysym kórsetip, shabýyldy barynsha údetti. Oıynnyń 67-shi mınýtynda «qaırattyqtardyń» esep ashýǵa tamasha múmkindigi boldy. Biraq, oń qaptaldan aıyp alańyna enteleı kirgen Ermek Qýantaevtyń birneshe metr jerden tepken doby qaqpadan qıys ketti.
Alma-kezek shabýyldardyń biri almatylyqtar úshin sátti aıaqtaldy. Qorǵaýshydan dopty tartyp alyp, sol qaptaldan aıyp alańyna engen Gael Tavamba qaqpashyny qapyda qaldyrdy. Kóp uzamaı Andreı Arshavınniń ornyna alańǵa shyqqan Islambek Qýat oń qaptaldan aıyp alańynyń syrtynan dopty bar pármenimen jer syzdyra teýip, qaqpada týlatty. Esep 2:0. Oıyn aıaqtalýǵa 3 mınýt qalǵanda Isael Barboza esepti 3:0-ge jetkizse, 1 mınýt qalǵanda Aslan Darabaev 4:0-ge jetkizdi. Osylaısha, «Qaırat» komandasy Qaraǵandynyń «Shahter» komandasyn 4:0 esebimen tize búktirdi.
Aıta ketelik, bıyl Qazaqstan Kýbogynda azdaǵan ózgerister oryn aldy. Sóıtip, bıyl ol jańa formatta ótkizilip jatyr. Týrnırde birinshi bolyp, 3 topqa bólinip, birinshi lıga komandalary oınady. Top jeńimpazdary 1/8 fınalǵa avtomatty túrde ótti. Taǵy bir komanda qosymsha kórsetkishteri arqasynda ótti.
