Qazaqstan kýbogy: Uzyndyqqa sekirýdiń úzdikteri anyqtaldy
ASTANA. QazAqparat - Óskemende Olga Rypakova atyndaǵy sport kesheninde ótip jatqan jeńil atletıkadan Qazaqstan kýbogy aıasynda uzyndyqqa sekirýden jarystar ótti, dep habarlaıdy QazAqparat.
Bul synda erler arasynda Ońtústik Qazaqstan oblysynyń atleti Vladımır Pototskıı (7,08 m) birinshi oryndy jeńip aldy. Ekinshi orynǵa Shyǵys Qazaqstan oblysynyń sportshysy Alekseı Ponomarev (6,92 m) ıe bolsa, úzdik úshtikti Qaraǵandy oblysynyń atleti Aleksandr Kıselev (6,87 m) túıindedi.
Áıelder arasynda bas júldeni qaraǵandylyq Marııa Ovchınnıkova (5, 63 m) qanjyǵasyna baılasa, «kúmisti» Almaty qalasynyń atleti Marına Hýseınova (5,61 m) jeńip aldy. Qola medal mańǵystaýlyq atlet Nadejda Kırnostyń (5, 58 m) enshisinde.
