Qazaqstan kýbogy: «Shahter» shırek fınalǵa joldama aldy

ASTANA. QazAqparat - Búgin fýtboldan Qazaqstan kýbogynyń shırek fınalyna shyqqan alǵashqy komanda anyqtaldy, dep habarlaıdy QazAqparat tilshisi.

Qazaqstan kýbogynyń 1/8 fınalynyń qarymta oıyndary 29 jáne 30 sáýirge belgilengen.

Alǵashqy kezdesýde kókshetaýlyq «Oqjetpes» óz alańynda qaraǵandylyq «Shahterdi» qabyldady.

Eki komanda arasyndaǵy birinshi oıynda qaraǵandylyq klýb 1:0 esebimen jeńiske jetken edi. Sondyqtan jarysty jalǵastyratyn komanda búgingi kezdesýde anyqtalýy múmkin edi.

Komandalar oıyn basynan shabýylǵa kóshti. Qaraǵandylyq klýb 32-mınýtqa deıin úsh gol soǵyp ketti.

Aldymen 6-mınýtta Tımýr Chogadze esep ashsa, odan keıin ıÝrıı Pertsýh 12, Ivan Svırıdov 15-mınýtta kózdegen nysanadan múlt ketken joq.

Al 32-mınýtta kókshetaýlyq Alekseı Tataev avtogol avtory atansa, 93-mınýtta Aıdos Táttibaev qorytyndy esepti belgiledi.

Osylaısha «Shahter» qarsylasynan 5:0 esebimen basym túsip, shırek fınalǵa joldama aldy.

Sondaı-aq, búgin, 29 sáýirde «Jetisý» (Taldyqorǵan) men «Qyzyljar» (Petropavl), «Ordabasy» (Shymkent) men «Maqtaral» (Túrkistan oblysy), «Atyraý» - «Aqtóbe» sheberlik baıqasady.

Al 30 sáýirde «Aqsý» (Pavlodar oblysy) men «Tobyl» (Qostanaı), «Turan» (Túrkistan) men «Kaspıı» (Aqtaý), «Aqjaıyq» (Oral) pen «Qaırat» (Almaty), «Qaısar» (Qyzylorda) men «Astana» jasyl alańǵa shyǵady.