Qazaqstan kýbogynda Aqtóbe men Jetisý oblysynyń quramasy jeńimpaz atandy
ASTANA. KAZINFORM – Shymkentte 14 jasqa deıingi tennısshiler arasynda Qazaqstan kýbogy aıaqtaldy. Komandalyq birinshilik 24-29 tamyz aralyǵynda «Beeline Arena» korttarynda ótti. Uldar men qyzdar arasyndaǵy jarysqa elimizdiń ár óńirinen 16 komandadan qatysty.
Tennıs federatsııasy málimetinshe, uldar arasynda Aqtóbe oblysynyń quramasy jeńimpaz atandy. Fınalda komanda Shymkent ókilderimen kezdesip, 2:1 esebimen jeńiske jetti.
Alǵashqy jekeleı kezdesýde aqtóbelik Albara Orazbaı Parvız Sapaevty 2:6, 6:0, 6:1 esebimen jeńdi. Odan keıin Syrymjan Barlykov ıAroslav Bobrovtan 6:2, 6:0 esebimen basym túsip, óz komandasyna jalpy jeńisti qamtamasyz etti.
Uldar arasyndaǵy qola júldeni Almaty-1 komandasy ıelendi. Úshinshi oryn úshin kezdesýde almatylyqtar Astana-1 komandasyn 2:1 esebimen jeńdi.
Uldar arasyndaǵy qorytyndy úshtik:
1 — Aqtóbe oblysy
2 — Shymkent
3 — Almaty-1
Qyzdar arasynda Jetisý oblysynyń quramasy birinshi oryn aldy. Sheshýshi kezdesýde Jetisý tennısshileri Shymkent komandasyn 2:1 esebimen jeńdi.
Aıym Qanaǵatova Aılın Morozdy 6:0, 6:1 esebimen jeńip, komandasyna alǵashqy upaıdy ákeldi. Keıin Shymkent ókili Emılııa Starýseva Adema Alseıpýlovany 6:3, 7:6 (5) esebimen jeńip, jalpy esepti teńestirdi. Kýbok ıegeri juptyq kezdesýde anyqtaldy. Onda Qanaǵatova men Alseıpýlova Starýseva men Týzelbaevadan 6:0, 6:0 esebimen basym tústi.
Úshinshi oryndy Astana-1 komandasy ıelendi. Qola júlde úshin kezdesýde elordalyq tennısshiler Qaraǵandy oblysynyń ókilderin 2:1 esebimen jeńdi.
Qyzdar arasyndaǵy týrnır qorytyndysy:
1 — Jetisý oblysy
2 — Shymkent
3 — Astana-1
Qazaqstan kýbogy komandalyq formatta ótti. Birinshi kezeńde qatysýshylar tórt topqa bólindi. Odan keıin úzdik komandalar pleı-off kezeńinde birinshi orynnan segizinshi orynǵa deıingi oryndar úshin talasty.
Aıta keteıik, Qazaqstan velotrekten Azııa kýbogynda bes altyn medal jeńip aldy.
