Qazaqstan kýbogy: «Ordabasy» men «Astana» shırek fınalǵa shyqty

ASTANA. KAZINFORM – Búgin fýtboldan Qazaqstan kýbogynyń shırek fınalyna shyqqan komandalar qataryn «Ordabasy» men «Astana» tolyqtyrdy. 

Jarystyń 1/8 fınaldyq kezeńinde shymkenttik «Ordabasy» syrt alańda almatylyq «Han Táńiri» komandasymen kezdesti. Almatylyq klýb bıyl birinshi lıgada oınaıdy. Al shymkenttik komanda Premer-lıgada sońǵy orynnyń birin mise tutyp keledi. Sondyqtan «Ordabasy» búgingi oıynǵa negizinen negizgi quramdy shyǵardy. 

Kezdesý barysynda «Han Táńiri» fýtbolshylary laıyqty oıyn kórsete bildi. Dese de ózderiniń qaqpasyna eki gol jiberip aldy. Oıynnyń 25-mınýtynda shymkenttik klýbtan Everton esep ashsa, 47-mınýtta Sherıf Jımo esepti ústemeleı tústi. Osylaısha qarsylasyn 2:0 esebimen qapy qaldyrǵan «Ordabasy» shırek fınalǵa joldama aldy.

Taǵy bir kezdesýde kókshetaýlyq «Oqjetpes» óz alańynda elordalyq «Astana» komandasyn qabyldady. Oıynnyń negizgi kezeńi 1:1 esebimen teń aıaqtaldy. Penaltı serııasynda «Astana» 9:8 esebimen qarsylasynan basym tústi. Elordalyq klýb kelesi kezeńge shyqty.

Dál qazir «Jeńis» (Astana) pen «Aqtóbe» kezdesýiniń birinishi kezeńi aıaqtaldy. Ázirge esep — 1:0.
Al 19:00-de «Tobyl» (Qostanaı) men «Jetisý» (Taldyqorǵan) oınaıdy.

Buǵan deıin Dastan Sátpaevtyń «Qaıratty» jeńiske jetelegenin jazǵan edik. 

Endi shırek fınalda «Ordabasy» men «Astana» kezdesedi. Sondaı-aq taǵy eki jupta «Qaırat» (Almaty) pen «Turan» (Túrkistan), «Elimaı» (Semeı) men «Qyzyljar» (Astana) sheberlik baıqasady.