Qazaqstan kýbogy: «Qaırat» Oralda «Jaıyqtan» basym tústi
ORAL. KAZINFORM – Qazaqstan kýbogy úshin matchta jergilikti «Jaıyq» klýby Almatynyń «Qaıratyn» qabyldady.
Vıacheslav Nevolnıkov jattyqtyratyn oraldyqtar birinshi lıgada óner kórsetse, almatylyqtardyń Qazaqstan chempıonatynda kósh bastap kele jatqany belgili.
«Jaıyqtyń» Eýropa chempıondar lıgasynyń negizgi kezeńinde baq synaǵan «Qaıratpen» oınaıtyny jankúıerlerdiń úlken qyzyǵýshylyǵyn týǵyzdy. Match ótetin P.Atoıan atyndaǵy stadıonǵa 8 320 bılet kúni buryn satylyp ketti.
«Qaırattyń» bas bapkeri Rafael Ýrazbahtın jastarǵa úmit artty.
Básekede aldymen alań ıeleri esep ashty. 25-mınýtta komanda kapıtany Baýyrjan Omarov áýeletken dopty Tımýr Muhametjanov baspen qaqpaǵa dál soqty. Degenmen 36-mınýtta qarsy shabýylda 18 jastaǵy Azamat Tuıaqbaev tarazy basyn teńestirdi.
Ekinshi taımda A.Tuıaqbaev 51-mınýtta «Qaıratty» alǵa shyǵardy. 72-mınýtta qorǵaýshynyń qateligin paıdalanǵan 17 jastaǵy Evgenıı Petrık esepti 3:1-ge jetkizdi.
Osylaısha, almatylyqtar 1/8 fınalǵa joldama aldy.
Eske sala keteıik, budan buryn Oraldyń «Jaıyǵy» birinshi lıganyń betashar oıynyn jeńispen bastaǵanyn jazǵan bolatynbyz.
Sondaı-aq «Tobyl» Qazaqstan kýbogy 1/16 fınalynda jeńiske jetti.
