Qazaqstan kýbogy: Dastan Sátpaev «Qaıratty» jeńiske jeteledi

ASTANA. KAZINFORM — Búgin fýtboldan Qazaqstan kýbogynyń ¼ fınalyna berilgen taǵy eki joldamaǵa almatylyq «Qaırat» pen túrkistandyq «Turan» ıe boldy.

Almatylyq klýb óz alańynda Aqtaýdyń «Kaspıı» klýbyn qabyldady. «Qaırat» bıyl birinshilikte kósh basynda tursa, aqtaýlyq komanda birinshi lıgada synǵa túsedi. Soǵan qaramastan irikteý kezeńinen irkilmeı ótip, 1/8 fınalǵa deıin jetti.

Kezdesý barysynda almatylyq fýtbolshylar oıyn tizginin qolǵa alýǵa tyrysty. Oıynnyń 9-mınýtynda Georgı Zarıa penaltıden múlt ketpese, 45-mınýtta taǵy sondaı múmkindikti paıdalana bildi.

Ekinshi kezeńde Dastan Sátpaev kózdegen nysanadan mult ketken joq. On alty jastaǵy jas juldyz birinshilik jáne kýbok oıyndaryn qosa alǵanda bıyl tórtinshi golyn soǵyp úlgerdi.

Osylaısha «Qaırat» qarsylasynan 3:0 esebimen basym túsip, shırek fınalǵa joldama aldy.
Al «Turan» «Atyraýdy» 2:0 esebimen tize búktirip, jarystyń kelesi satysyna shyqty.

Endi shırek fınalda «Qaırat» pen «Turan» kezdesedi.

Taǵy bir jupta «Elimaı» men «Qyzyljar» oınaıdy. Búgin «Elimaı» komandasy «Ulytaýdy» 3:0, «Qyzyljar» fýtbol klýby «Qaısardy» 1:0 esebimen jeńdi.

Al 13 sáýirde «Han táńiri» (Almaty) pen «Ordabasy» (Shymkent), «Oqjetpes» (Kókshetaý) men «Astana», «Jeńis» (Astana) pen «Aqtóbe», «Tobyl» (Qostanaı) men «Jetisý» (Taldyqorǵan) oınaıdy.