TMU:Qazaqstan – eń qýatty túrkitildes memleketterdiń biri
ASTANA. KAZINFORM – Qazaqstandaǵy referendým qoǵamnyń keń qatysýymen ótip jatyr. Bul jóninde Túrki memleketteri uıymynyń Bas hatshysynyń orynbasary Omer Kodjaman Halyqaralyq baıqaýshylarǵa qolǵabys kórsetý ortalyǵynda ótken brıfıngte habarlady.
Onyń aıtýynsha, baıqaýshylar referendýmnyń joǵary belsendilikpen ótip jatqanyna kýá boldy.
– Baqylaý barysynda daýys berý protsesi qoǵamnyń barlyq tobynyń qatysýymen, qyzyǵýshylyq pen joǵary belsendilikpen ótkenin kórdik. Komıssııa músheleri joǵary deńgeıde daıyndalǵan. Eriktiler men baıqaýshylar óz jumystaryn sapaly oryndap jatyr. Barlyq ýchaskelerde tártip saqtalǵan, zań talaptary tolyq oryndalǵan. Bul – óte mańyzdy kórsetkish, – dedi O. Kodjaman.
Ol sondaı-aq konstıtýtsııalyq ózgeristerge daýys berý protsesi de tıisti deńgeıde uıymdastyrylǵanyn atap ótti.
– Referendým nátıjesinde engiziletin reformalar eldiń damýyna oń yqpal etedi dep senemiz. Bul qadam qazaq halqyna, Qazaqstan memleketine jáne jalpy túrki álemine ıgilik ákelsin. Qazaqstan – qýatty túrkitildes memleketterdiń biri. Qurylymy serpindi, aımaqta úlken kúshke ıe. Eger jańa Konstıtýtsııa qabyldansa, eldiń damý múmkindikteri odan ári keńeıedi dep senemiz, – dedi Túrki memleketteri uıymy Bas hatshysynyń orynbasary.
Aıta keteıik, buǵan deıin referendým eshqandaı quqyq buzýsyz ótip jatqany jóninde halyqaralyq baıqaýshy málimdemesin jarııalaǵanbyz.
