Qazaqstan qýaty kúshti sýperkompıýter qurýǵa kiristi
ASTANA. KAZINFORM – Memlekettik jáne kommertsııalyq sektordaǵy ıesi naqtylanbaǵan derekterdi jınaqtaı bergen jón. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.
«Jasandy ıntellektiniń negizgi arqaýy – málimetter, derekter. Alaıda, bul jerde máseleniń eki jaǵy bar ekenin eskerý qajet, bir jaǵynan, málimetter kópke qoljetimdi bolýy kerek, ekinshi jaǵynan, qaýipsizdik, jeke málimetterge qol suqpaý, málimetterdiń sapaly bolýyn qamtamasyz etý máselesi bar. Úkimet 87 memlekettik málimetter bazasynan quralatyn derekqor qalyptastyrdy. Alaıda jasandy ıntellektiniń ozyq úlgilerin jasaý úshin munyń ózi azdyq etedi. Sondyqtan memlekettik jáne kommertsııalyq sektordaǵy ıesi naqtylanbaǵan derekterdi jınaqtaı bergen jón», - dedi Prezıdent.
Sondaı-aq, Memleket basshysy derekterdi basqarý júıesiniń biryńǵaı arhıtektýrasyn engizgen durys ekendigin basa aıtty.
«Biz qýaty kúshti sýperkompıýter qurýǵa kiristik. Ol ǵalymdarǵa ǵana emes, sonymen qatar bizdiń naryqta jumys isteıtin túrli kompanııalarǵa da qoljetimdi bolady. Bul qadam «aýqymdy derekterdi» keńinen qoldanýǵa tyń serpin beretinine senimdimin», - dedi Qasym-Jomart Toqaev.
