Elimizdegi kitaphanalarda 73 mln shamasynda kitap bar
Almatyda Kitaphanashylar kúni merekesine oraı «Kitaphana – parasat ordasy» atty saltanatty is-shara ótti. Mádenıet jáne aqparat mınıstri Aıda Balaeva sala mamandaryn kásibı merekemen quttyqtap, kitaphanalardyń qoǵamdaǵy róli men kitaphanashylardyń eńbegin aıryqsha atady. Bul týraly Mádenıet jáne aqparat mınıstrligi habarlaıdy.
Beınebaılanys arqyly quttyqtaý sózinde mınıstr Qazaqstan kitaphanashylarynyń aldynda búginde orasan zor mádenı murany saqtaý ǵana emes, odan bólek te mańyzdy maqsattar turǵanyna toqtaldy. Kitaphanashylar osy murany nasıhattaý, ony mádenıettiń jańa ónimine aınaldyrý úshin belgili bir jańa kommýnıkatsııalyq orta qurý boıynsha úlken mindetter qoıýy kerek ekenin aıtty. Sondaı-aq, memleket tarapynan kitaphana mamandarynyń bilimi men biliktiligine aıryqsha kóńil bólinip otyrǵanyn jetkizdi.
«Kitaphana – bilim men mádenıettiń, shyǵarmashylyq pen rýhanııattyń qasıetti shańyraǵy. Sizderdiń eńbekterińiz arqyly elimizdiń ár azamaty bilim alýǵa, mádenı muramen tanysýǵa, rýhanı baılyqqa qol jetkizýge múmkindik alyp otyr. Elimizde 12 myńǵa tarta kitaphana bar, onyń ishinde Mádenıet jáne aqparat mınıstrligine qarasty 4 myńǵa jýyq kitaphana jumys isteıdi. Atalmysh kópshilikke qoljetimdi kitaphanalarda 9 502 kitaphanashy qyzmet atqarýda. Kitaphanalarda jalpy sany 73 mln shamasynda kitap bar. Elektrondy resýrstyń tsıfrlyq kóshirmeleri 77 myńnan asty. Bul bizdiń elimizdiń baǵa jetpes rýhanı baılyǵy. Aıryqsha eńbektiń arqasynda jyl saıyn kópshilik kitaphanalardy paıdalanýshylar sany artyp keledi. Kásibı mereke qarsańynda kitaphana qyzmetkerlerine kúndelikti qajyrly qyzmeti, ulttyq jáne álemdik murany saqtaı otyryp, oqyrmandardy aqparatpen qamtamasyz etýde atqaryp jatqan eseli eńbegi úshin alǵys aıtamyn. Sizderge zor densaýlyq, baqyt, amandyq, jańa shyǵarmashylyq tabys pen ıgi isterińizge sáttilik tileımin!» – dedi Aıda Balaeva.
Saltanatty sharada Arhıv, qujattama jáne kitap isi komıtetiniń tóraǵasy Rýstam Álı úzdik kitaphanashylarǵa mınıstrliktiń marapattaryn tabys etti. Vedomstvolyq nagradalarmen 143 kitaphana qyzmetkeri marapattaldy.
Onyń ishinde 35 qyzmetker «Mádenıet salasynyń úzdigi» tósbelgisin ıelendi.
Merekelik is-shara respýblıkaǵa tanymal zamanaýı ánshilerdiń kontserttik baǵdarlamasymen aıaqtaldy.
