Qazaqstan krıptovalıýta engizý boıynsha álemdegi 146 eldiń ishinen 64-oryn aldy
ASTANA. QazAqparat – Kúsh qurylymdarynyń qyzmetkerleri tsıfrlyq aktıvtermen jumys isteý jáne krıptovalıýtalardy qadaǵalaý boıynsha trenıngten ótti, dep habarlaıdy QazAqparat.
Astana qalasynda 26-29 maýsym aralyǵynda «Tsıfrlyq aktıvter: táýekelderdi basqarý» taqyrybynda trenıng ótti. Trenıngti Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrligi BUU-nyń esirtki jáne qylmys jónindegi basqarmasymen birlesip uıymdastyrdy.
Oqytý baǵytyndaǵy is-shara quqyq qorǵaý jáne memlekettik organdardyń tsıfrlyq aktıvtermen jumys isteý, krıptovalıýtalardy qadaǵalaý jáne tsıfrlyq álemdegi jańa úrdister boıynsha biliktilikti arttyrý maqsatynda ótti. Trenıng baǵdarlamasy vırtýaldy aktıvterdiń jumys erekshelikteri, ortalyq banktiń tsıfrlyq valıýtasyna baılanysty salyqtar men táýekelder (Central Bank digital currency, CBDC) syndy taqyryptardy qamtydy.
BUU-nyń esirtki jáne qylmys jónindegi basqarmasynyń sarapshylary, sondaı-aq QR TsDIAÓM elektrondyq ónerkásipti jáne tsıfrlyq aktıvter ındýstrııasyn damytý departamentiniń ókilderi sóz sóıledi.
«Chainalysis analıtıkalyq kompanııasynyń derekterine sáıkes, Qazaqstan 2022 jyldyń qorytyndysy negizinde, krıptovalıýtalardy engizý boıynsha álemdegi 146 eldiń ishinen 64-orynǵa turaqtady. Bul elimizdiń álemdik tsıfrlyq aktıvter ekojúıesiniń belsendi qatysýshysy ekenin kórsetedi. Vırtýaldy jáne tsıfrlyq aktıvterdiń aınalymyn retteıtin zań ashyq jáne qaýipsiz naryqty damytýǵa múmkindik beredi. Mundaı zańdar álemniń barlyq elinde qoldanylmaıdy. BUU TsDIAÓM-niń osy naryqty damytý jáne mamandardy oqytý jónindegi jumysyn quptaıdy, biz muny qoldaýǵa árqashan daıynbyz», – dep atap ótti BUU-nyń esirtki jáne qylmys jónindegi basqarmasynyń keńesshisi Alekseı Feşenko.
Búgin osy trenıng aıasynda TsDIAÓM-de tsıfrlyq aktıvter naryǵyn damytýdy strategııalyq josparlaý boıynsha workshop uıymdastyryldy. Onyń qatysýshylary Qazaqstandaǵy tsıfrlyq maınıngtiń retteýshi sharttaryn jáne aldaǵy 3 jylǵa tsıfrlyq aktıvter naryǵyn damytýdy strategııalyq josparlaý máselelerin talqylady.
Trenıngte jáne workshop-ta Bas prokýratýrasynyń, Qarjy mınıstrligi Memlekettik kirister komıtetiniń, Qarjy naryǵyn retteý jáne damytý agenttiginiń, Qarjy monıtorıngi agenttiginiń, Sybaılas jemqorlyqqa qarsy is-qımyl agenttiginiń, Ulttyq Bankiniń, sondaı-aq «Astana» halyqaralyq qarjy ortalyǵynyń qyzmetkerleri qatysty.
