Qazaqstan kreatıvti ındýstrııadan túsetin tabysty arttyrmaq
ASTANA. KAZINFORM — Elimizde kreatıvti ındýstrııany damytýǵa baǵyttalǵan jańa zań jobasy ázirlenip jatyr. Onyń negizgi baǵyttary týraly Quryltaı depýtaty, Tsıfrlandyrý, ınnovatsııalar jáne ǵylym komıtetiniń múshesi Gúlishan Nahbaeva aıtyp berdi.
Depýtattyń aıtýynsha, memleket kreatıvti ekonomıkanyń jalpy ishki ónimdegi úlesin 3 paıyzǵa deıin jetkizýdi kózdeıdi. Sebebi Ulttyq statıstıka bıýrosynyń derekterine sáıkes, sońǵy bes jylda bul kórsetkish 1 paıyzdan aspaǵan. Sondyqtan salany damytý úshin ony qarjylandyrý, ınfraqurylymyn jetildirý jáne memlekettik qoldaý tetikterin júıeleý qajet.
— Qazir sarapshylar toby zań jobasyn ınstıtýtsıonaldyq, qarjylandyrý jáne ınfraqurylym máseleleri boıynsha qarastyryp jatyr. Bul — tek Mádenıet jáne aqparat mınıstrliginiń quzyryndaǵy másele emes, — dedi Gúlishan Nahbaeva Jibek Joly arnasyndaǵy «Búgin Live» baǵdarlamasynda.
Zań jobasy aıasynda shyǵarmashylyq ónimderdi qoldaýmen qatar, avtorlardyń quqyqtaryn qorǵaý jáne otandyq týyndylardy shetelde ilgeriletý tetikterin jetildirý kózdelip otyr. Bul baǵyttarda Ádilet, Ekonomıka jáne sport salalaryna jaýapty memlekettik organdardyń da mindetteri bar. Al qazaqstandyq ónimderdi halyqaralyq naryqqa shyǵarýǵa QazTrade kompanııasy qoldaý kórsetedi.
Jumystyń nátıjeli bolýy úshin memlekettik organdar arasyndaǵy úılestirýdi kúsheıtý mańyzdy. Depýtattyń sózinshe, Quryltaı janyndaǵy Tsıfrlandyrý, ınnovatsııalar jáne ǵylym komıtetiniń bazasynda segiz saraptamalyq top qurylǵan. Olardyń biri kreatıvti ekonomıkany damytý máselelerin qarastyrady.
Kreatıvti ındýstrııa mýzyka, kıno, dızaın jáne oıyn ázirleý sııaqty 53 baǵytty qamtıdy. Zań jobasy aıasynda osy salalardyń basym baǵyttaryn aıqyndaý josparlanyp otyr. Depýtat Qazaqstan úshin Ońtústik Koreıanyń tájirıbesi mańyzdy ekenin atap ótti.
— Qazaqstanda án óneri, kınoındýstrııa jáne geımdev naryǵy damyp keledi. Bizge Ońtústik Koreıanyń tájirıbesi úlgi bola alady. Olar kreatıvti ındýstrııamen qatar kreatıvti týrızmdi de damytyp jatyr. Máselen, elimizge ánshi Dımash Qudaıbergenniń kontsertine shetelden arnaıy týrıster keledi. Bul — shyǵarmashylyq ónimniń týrızmge de serpin bere alatynynyń aıqyn mysaly, — dedi Gúlishan Nahbaeva.
Eske salaıyq, buǵan deıin Astanada Qyzylorda oblysynyń kreatıvti ındýstrııalar jármeńkesi ótip jatqanyn jazǵanbyz.
