Qatar Airways ushaǵymen Qazaqstanǵa Aýstralııadan asyl tuqymdy qoılar jetkizildi
ASTANA. KAZINFORM — Qazaqstanǵa Aýstralııadan dorper jáne «Aýstralııalyq aq» tuqymdarynyń 1 765 bas asyl tuqymdy qoıy jetkizildi. Mal Aqmola jáne Soltústik Qazaqstan oblystaryndaǵy eki sharýashylyqqa bólinip, elde etti qoı sharýashylyǵynyń genetıkalyq bazasyn damytýǵa baǵyttalady. Bul týraly AShM málim etti.
Qazaqstan etti baǵyttaǵy qoı sharýashylyǵynyń áleýetin álemdik ozyq genetıkany tartý arqyly arttyrmaq. 30 qazanda Aýstralııadan áýe kóligimen dorper jáne «Aýstralııalyq aq» tuqymdarynyń iri partııasy jetkizildi. Asyl tuqymdy mal et ónimdiligi joǵary qoı sharýashylyǵyn damytý jobalaryn júzege asyryp jatqan otandyq eki sharýashylyqqa arnalǵan.
Atap aıtqanda, Aqmola oblysyndaǵy «Ereımentaý-Astyq-2014» JShS úshin Astana halyqaralyq áýejaıyna dorper tuqymynyń 1 100 bas qoıy jetkizildi. Bul jetkizilim sharýashylyqtyń 4 myń bas usaq mal satyp alý jónindegi aýqymdy jobasynyń alǵashqy kezeńi jáne «Bereke» jeńildetilgen nesıeleý baǵdarlamasy aıasynda júzege asyrylýda.
Sondaı-aq Soltústik Qazaqstan oblysy Ǵabıt Músirepov atyndaǵy aýdanyndaǵy «Eco Lamb» JShS úshin 665 bas asyl tuqymdy mal ákelindi. Onyń ishinde 497 bas «Aýstralııalyq aq» tuqymy jáne 168 bas dorper tuqymdy saýlyq bar.
«Eco Lamb» sharýashylyǵy avstralııalyq aq tuqymdy qoı ósiretin asyl tuqymdy reprodýktor qurýdy josparlap otyr. Aýstralııalyq tuqymdardyń tańdalýy olardyń joǵary genetıkalyq áleýetine, et ónimdiliginiń aıqyn erekshelikterine jáne tez jetilgishtigine baılanysty. Mundaı mal basyn paıdalaný otar ónimdiligin arttyrýǵa, óndiriletin ónimniń taýarlyq sapasyn jaqsartýǵa jáne qoı etin óndirýdiń tıimdiligin arttyrýǵa negiz bolady.
Asyl tuqymdy reprodýktordyń iske qosylýy Qazaqstan aýmaǵynda joǵary ónimdi mal basyn óz betinshe kóbeıtýge, sapaly asyl tuqymdy materıaldyń otandyq qoryn qalyptastyrýǵa jáne ony aldaǵy ýaqytta basqa sharýashylyqtarǵa taratýǵa múmkindik beredi.
Osylaısha, Aýstralııadan mal jetkizý tek asyl tuqymdy mal basyn kóbeıtýdi ǵana emes, sonymen qatar salanyń uzaq merzimdi genetıkalyq negizin qalyptastyrýdy kózdeıdi.
Bul jumys 2026–2030 jyldarǵa arnalǵan Mal sharýashylyǵyn damytý jónindegi keshendi jospar aıasynda júrgizilýde. Qujat aýyl sharýashylyǵy janýarlarynyń ónimdiligin arttyrýdy, asyl tuqymdy bazany nyǵaıtýdy, otandyq selektsııany damytýdy jáne mal sharýashylyǵy ónimderiniń óndirisin ulǵaıtýdy qarastyrady.
Aldaǵy ýaqytta mundaı bastamalardy júzege asyrý Qazaqstanǵa etti baǵyttaǵy qoı sharýashylyǵyn damytýdyń jańa, aýqymdy modeline kóshýge múmkindik beredi. Atap aıtqanda, baǵaly tuqymdardy óz elimizde kóbeıtý júıesi qalyptasyp, sapaly qoı etiniń turaqty usynysy qamtamasyz etiledi jáne eksporttyq múmkindikter keńeıedi. Sonymen qatar bul bastamalar ónimdi tereń óńdeýdi damytýǵa jáne otandyq ónimniń básekege qabilettiligin arttyrýǵa qosymsha serpin beredi.
Aıta keteıik, buǵan deıin Germanııadan Qazaqstanǵa quny 6 mlrd teńge 5 myń asyl tuqymdy mal ákelinetinin jazdyq.
