Qazaqstan qosymsha 1 mln tonna astyq eksporttaý múmkindigine ıe bolady
ASTANA. QazAqparat - Parlament Senatynyń jalpy otyrysynda «Qazaqstan Respýblıkasynyń Úkimeti men Azyq-túlik qaýipsizdigi jónindegi Islam Uıymy arasyndaǵy shtab-páter týraly kelisimdi ratıfıkatsııalaý» týraly zań jobasyn qabyldady, dep habarlaıdy QazAqparat.
«Qazaqstan 1995 jyldan beri Islam yntymaqtastyq uıymynyń múshesi. 2011 jyly maýsymda Astanada ótken IYU Syrtqy ister mınıstrler keńesiniń 38 sessııasynda QR Prezıdenti Nursultan Nazarbaev Uıym sheńberinde azyq-túlik boıynsha ózara kómek júıesin qurý bastamasyn kótergen bolatyn. Azyq-túlik resýrstaryn eksporttaıtyn memleket retinde mundaı uıymnyń shtab-páterin Qazaqstanda ornalastyrý usynylǵan edi. Osy usynysty IYU-nyń barlyq músheleri tolyqtaı qoldady. Búgingi tańda 32 memleket bul Uıymnyń jarǵysyna qol qoıdy, onyń ishinde 8 memleket ratıfıkatsııalady. Uıym jarǵysynyń 21 baby 1 tarmaǵyna sáıkes, qujatqa 12 memleket qol qoıǵannan keıin, ol aldyn ala qoldanylýy tıis, ıaǵnı jumysty bastaı berýine bolady», - dedi QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov.
Onyń sózine qaraǵanda, qabyldaýshy el retinde Qazaqstan Uıym hatshylyǵy ornalasýy úshin keńse beredi. Qalyptasqan halyqaralyq tájirıbege sáıkes, sondaı-aq bastamany ilgeriletý maqsatynda Uıym hatshylyǵy qyzmetiniń alǵashqy 3 jylyndaǵy shyǵyndaryn qarjylandyrý úshin Qazaqstan erikti jarnalar retinde jyl saıyn 749 myń AQSh dollaryn bólip otyr.
Uıymdy qurý jáne onyń shtab-páterin Astanada ornalastyrý elimizdiń azyq-túlik ónimderin eksporttaý áleýetin arttyrý boıynsha utymdy qadamdarǵa qol jetkizede. Osy oraıda Uıym aıasynda qosymsha 1 mln tonna astyq eksporttaý múmkindigine, aýyl sharýashylyǵy ınfraqurylymyn jaqsartýǵa, azyq-túlik ónimderin óndirýge tikeleı ınvestıtsııalar tartýǵa jol ashylady.
