Qazaqstan Kóshpendiler oıynynda 25 altyn medalmen kósh bastady
ASTANA. KAZINFORM — VI Dúnıejúzilik kóshpendiler oıyndarynyń aralyq qorytyndysy boıynsha Qazaqstan quramasy jalpykomandalyq esepte birinshi orynda tur, dep habarlaıdy Týrızm jáne sport mınıstrliginiń baspasóz qyzmeti.
4 qyrkúıektegi jaǵdaı boıynsha, el sportshylary 55 medal jeńip aldy. Onyń ishinde 25 altyn, 13 kúmis jáne 17 qola medal bar.
Ekinshi orynda Qyrǵyzstan quramasy keledi. Qyrǵyz sportshylarynyń qorjynynda 58 medal bar: 23 altyn, 24 kúmis jáne 11 qola. Úshinshi oryndy Reseı quramasy (4 altyn, 6 kúmis jáne 13 qola) ıelenip otyr.
Qazirgi ýaqytta Qazaqstan ókilderi Oıyndar baǵdarlamasyna engizilgen 42 sport túriniń 31-i boıynsha jarystarǵa qatysyp úlgerdi. Qazaqstandyq sportshylar aýdaryspaq, qazaq kúresi, alysh, armrestlıng, sambo, arqan tartý, dástúrli sadaq atý, at jarystary, qusbegilik jáne basqa da sport túrlerinen júldege ıe boldy.
Jarystar áli de jalǵasyp jatqandyqtan, komandalardyń medal esebindegi oryndary ózgerýi múmkin. Qazaqstan sportshylary áli de 11 sport túri boıynsha synǵa túsedi.
VI Dúnıejúzilik kóshpendiler oıyndaryna álemniń 113 elinen shamamen 3 myń sportshy qatysyp jatyr.
Osyǵan deıin «Alyptar saıysy» boıynsha Qazaqstan namysyn qorǵaǵan Vadım Makartsov úzdik úshtikten kórinip, qola júldege ıe bolǵanyn jazǵanbyz.
