Qazaqstan kóshi-qon júıesin eńbek naryǵynyń suranysyna beıimdep jatyr
ASTANA. KAZINFORM — Kóshi-qon saıasatynyń 2030 jylǵa deıingi tujyrymdamasynda kózdelgen sharalardy iske asyrý azamattardyń, ekonomıkanyń jáne memlekettiń múddelerine saı keletin zamanaýı ári tıimdi kóshi-qondy basqarý júıesin odan ári damytýǵa yqpal etedi.
Eńbek jáne halyqty áleýmettik qorǵaý mınıstrligi eńbek naryǵynyń suranysy men eldiń áleýmettik-ekonomıkalyq damý basymdyqtaryn eskere otyryp, kóshi-qon úderisterin basqarý júıesin jetildirýge baǵyttalǵan Qazaqstan Respýblıkasynyń kóshi-qon saıasatynyń 2030 jylǵa deıingi tujyrymdamasyn kezeń-kezeńimen iske asyrýdy jalǵastyryp jatyr.
Tujyrymdama kóshi-qon salasyndaǵy memlekettik saıasatty keshendi túrde damytýdy kózdeıdi. Onyń aıasynda ekonomıkany qajetti eńbek resýrstarymen qamtamasyz etý, ishki eńbek naryǵyn qorǵaý jáne suranysqa ıe bilikti mamandardy tartý baǵytyndaǵy sharalar ózara úılestirilip júzege asyrylyp jatyr.
Kóshi-qon salasyn tsıfrlandyrý sheńberinde memlekettik organdardyń aqparattyq júıelerimen ıntegratsııalanǵan biryńǵaı tsıfrlyq platformany damytý jumystary júrgizilýde. Bul vedomstvoaralyq ózara is-qımyldyń tıimdiligin arttyrýǵa, sondaı-aq memlekettik qyzmetterdiń sapasy men qoljetimdiligin jaqsartýǵa múmkindik beredi.
Suranystaǵy mamandyq ıeleri úshin Qazaqstanda turaqty turýǵa ruqsat alý tártibi jetildirilýde. Sonymen qatar sheteldik jumys kúshin tartý tetikteri de odan ári damytylyp, jumys berýshilerdiń jaýapkershiligi kúsheıtilip, qazaqstandyq mamandardyń kásibı bilimi men tájirıbesin jetildirý maqsatynda tálimgerlik ınstıtýty keńinen qoldanylýda.
Erikti qonys aýdarý baǵdarlamasyn jetildirý jumystary kezeń-kezeńimen jalǵasyp jatyr. Baǵdarlamaǵa qatysýshylarǵa kórsetiletin memlekettik qoldaý kólemi keńeıtilip, ekonomıkalyq utqyrlyq sertıfıkatynyń mólsheri ulǵaıtyldy, qoldaý alýshylardyń sanaty keńeıtildi. Sonymen qatar azamattarǵa qonys aýdarǵanǵa deıin jumys oryndaryn aldyn ala irikteý tetikteri engizilip otyr.
Qonys aýdarýshylardy qabyldaý jáne olardyń qoǵamǵa beıimdelýine jaǵdaı jasaý máselelerine erekshe nazar aýdarylýda. Óńirlerde olarǵa óteýsiz negizde jumyspen qamtýǵa járdemdesý, tildik daıarlyqtan ótkizý, medıtsınalyq súıemeldeý jáne balalaryn bilim berý uıymdaryna ornalastyrýdy qamtıtyn keshendi ıntegratsııalyq qyzmetter kórsetiledi.
Beıimdeý júıesiniń mańyzdy tetikteriniń biri — memlekettik tildi meńgerý deńgeıin baǵalaý. Bul baǵalaý elge qonys aýdaratyndardyń qosymsha qoldaý sharalaryna degen qajettiligin aıqyndap, olardyń qoǵamǵa beıimdelýine jeke tásildi qalyptastyrýǵa múmkindik beredi.
— Qazaq tilin meńgerý deńgeıin baǵalaý elge kelýshilerdiń qazaqstandyq qoǵamǵa tabysty beıimdelýi úshin qandaı qoldaý qajet ekenin aıqyndaýǵa baǵyttalǵan. Qajet bolǵan jaǵdaıda olarǵa tıisti memlekettik qoldaý sharalary kórsetiledi, — dedi Eńbek jáne halyqty áleýmettik qorǵaý mınıstrligi Kóshi-qon komıteti tóraǵasynyń mindetin atqarýshy Elmıra Tillábaıqyzy.
Aıta ketelik UKQ elordadaǵy kóshi-qon qyzmeti basshysynyń orynbasaryn ustaýǵa qatysty túsinik bergen edi.
