Danııalyq FLSmidth Qazaqstandaǵy óndiristi lokalızatsııalaýǵa ınvestıtsııa quıady
ASTANA. KAZINFORM - Qazaqstan Respýblıkasy Syrtqy ister mınıstrliginiń Investıtsııa komıtetiniń tóraǵasy Ǵabıdýlla Ospanqulov Danııanyń FLSmidth kompanııasynyń bas dırektory Tonı Laaksonenmen kezdesý ótkizdi.
Kelissózder barysynda taraptar taý-ken jáne tsement ónerkásibi salasyndaǵy jetekshi halyqaralyq ınjenerlik kompanııalardyń birimen yntymaqtastyqty odan ári tereńdetý perspektıvalaryn talqylady.
Sondaı-aq taraptar Qaraǵandy qalasyndaǵy kompanııanyń qyzmet kórsetý ortalyǵyn keńeıtý jobasyn iske asyrý máselelerin qarastyrdy. Joba Qazaqstan men Ortalyq Azııanyń taý-ken kásiporyndaryna qyzmet kórsetýge arnalǵan servıstik ınfraqurylymdy jańǵyrtý men edáýir keńeıtýdi kózdeıdi. Investıtsııalardyń jalpy kólemi shamamen 15 mln AQSh dollaryn quraıdy.
Ǵ.Ospanqulov atalǵan joba jabdyq jetkizýge, óndiristi lokalızatsııalaýǵa jáne zamanaýı tehnologııalar transfertine baǵyttalǵan uzaq merzimdi ónerkásiptik seriktestiktiń úlgisi retinde qarastyrylatynyn atap ótti.
Kompanııanyń qyzmet kórsetý ortalyǵynyń aldaǵy ashylýyn talqylaı otyryp, suhbattastar usynylatyn qyzmetterdiń keń aýqymyn, onyń ishinde jabdyq komponentterin óndirý jáne jańartý, taý-ken jabdyqtaryn jóndeý jáne jańǵyrtý, komponentter men jınaqtardy qurastyrý jáne tehnıkalyq qyzmet kórsetý, sondaı-aq taý-ken metallýrgııa kásiporyndaryna ınjenerlik-tehnıkalyq qoldaý kórsetý máselelerin atap ótti.
Kezdesý qorytyndysy boıynsha taraptar dıalogty jalǵastyrýǵa jáne ózara tıimdi yntymaqtastyqty odan ári damytýǵa múddeli ekenderin rastady.
Osyǵan deıin Qazaqstan kómir óndirý kólemin ulǵaıtyp, jarty trıllıon teńge ınvestıtsııa tartatyny týraly jazdyq.
