Qazaqstan qorjynynda 26 joldama ǵana bar, bul tym az - Serik Jaraspaev
ASTANA. KAZINFORM — Bıyl Frantsııa tórinde alaýy tutanatyn XXXIII jazǵy Olımpıada oıyndaryna qazirgi tańda Qazaqstan quramasy sporttyń 9 túri boıynsha 26 lıtsenzııa alyp úlgerdi.
Naqtyraq aıtsaq, búgingi kúnge deıin el qorjynynda sporttyń 9 túrinen 24 sportshy 26 joldamaǵa qol jetkizgen. Atap aıtar bolsaq, sadaq atýdan – 4, tas joldaǵy velosporttan – 3, nysana kózdeýden – 5, qazirgi bessaıystan – 2, bokstan – 7, grek-rım kúresinen – 1, erkin kúresten – 1, sporttyq gımnastıkadan – 1, taekvandodan 2 joldama bar.
Osy oraıda Týrızm jáne sport mınıstriniń orynbasary Serik Jaraspaevqa arnaıy habarlasyp, joldama alǵan sportshylardyń qazirgi tańdaǵy daıyndyǵy týraly surap-bilgen edik.
«Joldama alǵan barlyq sportshy kerekti medıkamenttermen, dáriger-massajıstermen qamtamasyz etildi. Psıholog, nýtrıtsologtar sportshylarmen etene jumys istep jatyr. Barlyq joldamaǵa qol jetkizgen sportshy tórtjyldyqtyń basty dodasyna barynsha joǵary deńgeıde daıyndalý úshin barlyq múmkindikti qarastyryp, barynsha qoldaý kórsetip jatyrmyz. Ár sportshy arnaıy belgilengen baǵdarlamalar boıynsha jumys isteýde», - dedi ol.
Sonymen qatar Olımpıada oıyndary jaqyndap qalǵanyn, lıtsenzııalar sany áli kóńil kónshitpeı jatqanyn da tilge tıek etti.
«Olımpıadaǵa tórt-aq aıdaı ýaqyt qaldy. Qazir Qazaqstan ulttyq quramasynyń qorjynynda 26 joldama ǵana bar. Bul árıne, tym az. Kóńil kónshitpeıdi. Parıj Olımpıadasyna lıtsenzııalyq jáne reıtıngilik týrnırler 1 aı qalǵanda aıaqtalady. Sondyqtan barynsha joldama sarapqa salynatyn dodalarda bar kúsh-jigerimizdi salýymyz kerek. Alda áli 63 lıtsenzııalyq jáne reıtıngilik týrnır bar. Bizdiń maqsatymyz osy atalǵan týrnırlerde sátti óner kórsetip, 20-25 sport túrinen 80-ge jýyq lıtsenzııa ıelený», - dep atap ótti Týrızm jáne sport mınıstriniń orynbasary Serik Jaraspaev.
Esterińizge sala keteıik, XXXIII jazǵy Olımpıada oıyndary osy jyldyń 26 shildesi men 11 tamyzy aralyǵynda ótedi. Onda 32 sport túrinen 329 medal jıyntyǵy sarapqa salynady.
