Qazaqstan kórshiles eldermen sý boıynsha 38 kelissóz júrgizdi
ASTANA. KAZINFORM — Jyl basynan beri Sý resýrstary jáne ırrıgatsııa mınıstrligi kórshiles memlekettermen 38 kelissóz ótkizdi. Bul týraly vedomstvonyń baspasóz qyzmeti málim etti.
Onyń 27-si Ortalyq Azııa elderimen, 11-i QHR jáne Reseımen júrgizildi. Atap aıtqanda, Qyrǵyzstan jáne Ózbekstanmen birlesip, bıylǵy vegetatsııa kezeńine Toqtoǵul sý qoımasy men Úshqorǵan GES-iniń jumys rejımi kelisildi. Tájikstan jáne Ózbekstanmen «Bahrı-Tochık» sý qoımasynyń jumys rejımi jáne «Dostyq» memleketaralyq kanaly arqyly sý berý máselesi kelisildi.
Al Qyrǵyzstanmen Shý jáne Talas ózenderi arqyly sý berý rejımderi eki ret kelisildi. Ortalyq Azııa elderiniń sý sharýashylyǵy vedomstvolarymen úılesimdi jumystyń nátıjesinde bıylǵy vegetatsııa kezeńinde Shardara sý qoımasyna túsken sý kólemi boljamdy kórsetkishterden asyp tústi. Sonymen qatar byltyr qol qoıylǵan Qazaqstan Respýblıkasynyń Úkimeti men Ózbekstan Respýblıkasy Úkimeti arasyndaǵy transshekaralyq sý obektilerin birlesip basqarý jáne utymdy paıdalaný týraly kelisim ratıfıkatsııalandy.
– Jyl sońyna deıin 33 kezdesý ótkizý josparlanyp otyr. Onyń ishinde transshekaralyq sý obektilerin birlesip basqarý jáne utymdy paıdalaný jónindegi úkimetaralyq kelisimdi iske asyrýdyń turaqty tetigine aınalatyn Qazaqstan-Ózbekstan birlesken komıssııasyn qurý máselesi de qaralady. Sondaı-aq Syrdarııa ózeni basseınindegi sý qoımalarynyń vegetatsııaaralyq kezeńdegi jumys rejımderin bekitý, reseılik áriptestermen birlesip transshekaralyq ózender basseınderindegi sý sharýashylyǵy balansyn ázirleý jáne basqa da is-sharalar josparlanǵan, – dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Eske salaıyq, tamyz aıynyń basynda Sý resýrstary jáne ırrıgatsııa mınıstrligi janynan Qazaqstandaǵy alǵashqy Sý dıplomatııasy departamenti quryldy. Jańa departament eldiń transshekaralyq sý obektileri jónindegi turaqty jumys isteıtin memleketaralyq komıssııalarǵa qatysýyn úılestiredi, seriktes memlekettermen kelissózder protsesin súıemeldeıdi, sondaı-aq sý salasyndaǵy memleketaralyq kelisimderdi ázirleý jáne iske asyrý boıynsha jumysty júrgizedi.
Aıta keteıik, buǵan deıin OA elderi Syrdarııa basseıninde sý esebin avtomattandyrý josparynyń jobasyn ázirleıtinin jazdyq.
