Qazaqstan kórshi elderdiń sý sharýashylyǵy saıasatyna táýeldi – Ekologııa mınıstrligi
«Geografııalyq erekshelikterge baılanysty Qazaqstandaǵy 8 sý sharýashylyǵy basseıni transshekaralyq sanalady. Sonyń saldarynan Qazaqstan Qytaı, Reseı jáne Ortalyq Azııa elderiniń sý sharýashylyǵy saıasatyna táýeldi», - delingen Ashyq NQA portalynda jarııalanǵan Sý resýrstaryn basqarý júıesin damytýdyń 2023-2029 jyldarǵa arnalǵan tujyrymdamasynda.
Bul problemany sheshý maqsatynda jaýapty mınıstrlik transshekaralyq sýdy kórshi eldermen birlesip paıdalaný jáne ony qorǵaý týraly jańa kelisim jasaý qajet ekenin alǵa tartady.
«Transshekaralyq ózender aǵynynyń qysqarý úrdisin eskere otyryp, 2029 jylǵa deıin yntymaqtastyqty damytý sý qatynastary salasyndaǵy memlekettik saıasattyń negizgi aspektileriniń biri bolýǵa tıis. Sondyqtan transshekaralyq ózenderdi damytý, kórshi memlekettermen birlesip paıdalaný jáne qorǵaý týraly jańa ekijaqty jáne kópjaqty sharttyq bazany qurý men qoldanystaǵysyn jetildirý qajet. Atap aıtqanda, Qazaqstan men Ózbekstan, Qyrǵyzstan, Qytaı elderiniń úkimeti arasyndaǵy «Transshekaralyq sý obektilerin birlesip basqarý jáne paıdalaný týraly» kelisimge qol qoıý mańyzdy», - dep máseleniń sheshimi usynylǵan qujatta.
Josparǵa saı, atalǵan kelisimderge bıyl jeltoqsanda qol qoıý kózdelip otyr.
Tujyrymdamada keltirilgen boljamǵa saı, sý paıdalaný deńgeıi tómendemese, 2029 jylǵa qaraı sý tapshylyǵy bolýy múmkin. Bul eldiń áleýmettik-ekonomıkalyq damýyna qaýip tóndiredi.