Qazaqstan kórshi elderden jetkizilgen ónimderdi keri qaıtardy
ASTANA. QazAqparat - 2018 jylǵy 18-24 tamyz aralyǵynda Qazaqstan aýmaǵyna jetkizilgen karantındik fıtosanıtarııalyq qaýpi joǵary taýarlardy tekserý kezinde Qazaqstan Respýblıkasy men EAEO-nyń ósimdikter karantıni salasynda 48 zań buzýshylyq faktisi anyqtaldy. Bul týraly QR AShM baspasóz qyzmeti málim etti, dep habarlaıdy QazAqparat.
Atap aıtqanda, Reseıden karantınge jatqyzylǵan birqatar ónimdi ákelý kezinde ( sábiz - 3,5 tonna, kesilgen aǵash ónimderi - 36 tekshe metr , qyzanaq - 9,5 tonna) eksporttaýshy eldiń ulttyq karantındik qyzmetiniń fıtosanıtarııalyq sertıfıkaty usynylmaǵan. Sonymen birge, 18 tonna jasymyq jaramsyz sertıfıkatpen tasymaldandy.
Al Qyrǵyzstannan jetkizilgen kartop pen júzimde fıtosanıtarlyq sertıfakat bolmaǵan. Sonymen qatar, osy elden tasymaldanǵan ónim partııalarynda (nektarın - 6,4 tonna, júzim - 11,2 tonna, qulpynaı - 2 tonna, tańqýraı - 1,6 tonna, órik - 18 tonna) tıisti tańbalyq belgiler kórsetilmegen. Budan bólek, ónimdi ákelý kezinde (shabdaly - 7,1 tonna) karantınge jatqyzylǵan obekti - Komstok symyry (Pseudococcus comstocki (Kuwana)) anyqtaldy.
Ósimdikter karantıni jónindegi memlekettik ınspektorlar anyqtaǵan joǵaryda atalǵan buzýshylyqtar boıynsha kásipkerler ákimshilik jaýapkershilikke tartyldy. Sonymen qata, bul ónimder eksporttaǵan el aýmaǵyna qaıtaryldy.
