Qazaqstan kórshi elderge janarmaı satyp, tabys taba ala ma
ASTANA. KAZINFORM – Energetıka vıtse-mınıstri Qaıyrhan Tutqyshbaev aımaqtaǵy benzın tapshylyǵy kezinde jańa kelisimder ornatyp, qosymsha paıda tabý múmkindigi týraly suraqtarǵa jaýap berdi.
Úkimet úıinde tilshiler «Benzın tapshylyǵy kezinde Qazaqstan qandaı da bir paıda kóre ala ma? Qyrǵyzstan, Tájikstan nemese basqa da kórshi ári seriktes elderge janarmaı eksportyn ulǵaıtý múmkindigi bar ma?» degen suraq qoıdy.
Vıtse-mınıstr tek osy jaǵdaıda emes, ártúrli elderden kómek kórsetý nemese kórshi memleketterge janar-jaǵarmaı jetkizý múmkindigin qarastyrý jóninde ótinishter turaqty túrde túsetinin aıtýda.
— Eger mınıstrliktiń atyna osyndaı ótinishter tússe, biz eń aldymen ulttyq múdde turǵysynan qaraımyz. Biz úshin birinshi kezektegi mindet — óz azamattarymyzdy janar-jaǵarmaımen qamtý, ishki naryqtyń turaqtylyǵyn saqtaý. Al eger ózara tıimdi sharttar negizinde qandaı da bir kólemde otyndy shetelge jetkizý múmkindigi bolsa, ony qarastyrýymyz múmkin. Biraq qazirgi tańda kórshi elderge janar-jaǵarmaı jetkizý máselesi kún tártibinde turǵan joq, — dep jaýap berdi Qaıyrhan Tutqyshbaev.
Onyń aıtýynsha, qazir otyndy syrtqa satyp, keıin esh ishinde janarmaı tapshylyǵy týyndasa, onyń saldary aýyr bolady. Sondyqtan ishki naryqta tapshylyqqa jol bermeýge jáne halyqty benzın men dızel otynymen tolyq qamtamasyz etýge den qoıylmaq.
— Qazir elimizde janarmaı tapshylyǵy joq. Ázirge kórshi memleketterge janar-jaǵarmaı satý nemese jetkizý máselesi qaralyp jatqan joq. Biz jyl saıyn munaı óńdeý zaýyttarynyń óndiris jospary men ishki tutyný kólemin salystyryp, teńgerimin esepteımiz. Jyl sońyna deıin qandaı da bir janarmaı tapshylyǵy bolady dep boljap otyrǵan joqpyz. Kelesi jylǵa arnalǵan óndiris jospary bekitilgennen keıin de osy teńgerimdi qaıta qarap, qajetti qor kólemin qalyptastyramyz, — dedi Energetıka vıtse-mınıstri.
Buǵan deıin Qaıyrhan Tutqyshbaev Qazaqstan Reseıge gýmanıtarlyq kómek jiberedi degen aqparatty joqqa shyǵarǵan edi.
