Qazaqstan kórshi elderden elektr energııasyn ımporttaýdy toqtatady

ASTANA. KAZINFORM — QR Energetıka vıtse-mınıstri Suńǵat Esimhanov elimizdegi elektr energııasy boıynsha tapshylyq máselesi 2 jylda tolyq sheshiletinin aıtty.

— Byltyr 120 mlrd kVts tutyndyq, al syrttan satyp alǵanymyz 2,2 mlrd kVts shamasynda boldy, ıaǵnı 2 paıyzdan az. Bıyl ımporttalatyn energııany eleýli túrde azaıtýǵa áreket etip jatyrmyz. Osy jyly elektr stantsııalaryn jóndeýge ekpin qoıylǵan. Bıyl jańa energııa qýattaryn iske qosamyz, — dedi S. Esimhanov.

Onyń aıtýynsha, aldaǵy eki jylda Qazaqstan ózin tolyqtaı qamtamasyz etetin deńgeıge jetedi.

Budan buryn habarlanǵandaı, bıyl aqpan aıynda Senatta «Qazaqstan Úkimeti men Reseı Úkimeti arasyndaǵy QR men RF-tiń birtutas energetıkalyq júıeleriniń qatar jumys isteýin qamtamasyz etý jónindegi sharalar týraly kelisimdi ratıfıkatsııalaý týraly» Zańy maquldandy.