Qazaqstan koronavırýsty anyqtaıtyn praımerlerdi satyp alýdy bastady

NUR-SULTAN. QazAqparat – Qazaqstan Qytaıda órshigen koronavırýsty zerthanada anyqtaýǵa qajetti praımerlerdi satyp alýǵa kiristi. Bul týraly búgin Ortalyq kommýnıkatsııalar ortalyǵynda ótken brıfıngte QR Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary Jandarbek Bekshın málim etti, dep habarlaıdy QazAqparat tilshisi.

«Vırýstyń bolýy (adam aǵzasynda – red.) tek zerthanalyq jolmen anyqtalady. Dúnıejúzilik densaýlyq saqtaý uıymy vırýstyń qurylymyn aldy jáne bizge praımerlerdi usyndy. Bul arqyly koronavırýstyń bar-joǵyn anyqtaýǵa bolady. Osy kezeńde anyqtalý jaǵdaılaryn joqqa shyǵarý jáne málimetterdi ózara is-qımyl algorıtmi boıynsha DDU-ǵa jiberý jolymen jumys isteıtin bolamyz. Al keıinirek ózimiz de anyqtaı alatyn bolamyz», - deıdi Jandarbek Bekshın.

Onyń aıtýynsha, qazaqstandyq tarap koronavırýsty anyqtaýǵa qajet praımerlerdi satyp alý rásimin bastady.

«Bul praımerlerdi satyp alýdy bastadyq. Meniń oıymsha, vırýsty ıdentıfıkatsııalaýdy bir jarym-eki aıdyń ishinde qolǵa alamyz», - deıdi ol.