Qazaqstan koronavırýspen kúreske 13,5 mlrd dollar bóldi degen aqparat jalǵan - Qarjy mınıstri

NUR-SULTAN. QazAqparat - Qazaqstan koronavırýspen kúreske 150 mlrd teńge bólgen. QR Premer-mınıstriniń birinshi orynbasary - Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Internette keıbir blogerler Qazaqstanyń koronavırýspen kúreske 13,5 mlrd dollar jumsaǵandyǵyn jazyp, birshama az qarajat bólingen kórshi elderdiń keıbirimen salystyrýda. Bul múldem qate aqparat ekendigin aıtqym keledi. Koronavırýspen kúreske nemese indetke qarsy sharalarǵa respýblıkalyq bıýdjetten shamamen 150 mlrd teńge nemese dollarǵa shaqqanda 350 mln dollar bólindi», - dedi birinshi vıtse-premer Úkimet úıinde ótken brıfıngte.

Onyń túsindirýinshe, atalǵan soma daǵdarysqa qarsy sharalardy júzege asyrýǵa baǵyttalǵan 5,9 trln teńgeniń ishine kiredi.

«Bul -jumyspen qamtý, áleýmettik tólemder, bıznesti qoldaý, kásipkerlerdi jeńildikpen kredıtteý, turǵyn úı qurylysy jáne basqalary. Bul qarajat jyl boıyna josparlanǵan. Máselen, bıznesti jeńildikpen kredıtteýge 1 trln teńge jumsalady. Bul qaıtarylatyn qarajat, bızneske tómengi mólsherlememen kredıt túrinde beriledi», - dedi ol.

Álıhan Smaıylovtyń aıtýynsha, «Jumyspen qamtý jol kartasyn» júzege asyrýǵa 1 trln teńge baǵyttalady. Onyń 300 mlrd teńgesi bıýdjet, al qalǵany bıýdjetten tys qarajat sanalady. Bul qarajatqa áleýmettik nysandardy, turǵyn úı-kommýnaldyq sharýashylyq nysandaryn, ınjenerlik ınfraqurylymdar salýǵa jáne jóndeýge, eldi mekenderdi abattandyrýǵa jumsalady. 255 myń jumys orny qurylady.

«ıAǵnı, Úkimet baǵyttap otyrǵan qarajattyń barlyǵy osy jyl boıy jaratylady. Onyń áleýmettik-ekonomıkalyq mańyzy zor jáne halyqty jumyspen qamtýǵa, olardyń kirisin saqtaýǵa jáne eldiń iskerlik belsendiligin qoldaýǵa múmkindik beredi», - dedi Álıhan Smaıylov.

Eske sala ketsek, eldegi jumyspen qamtýdy jáne áleýmettik-ekonomıkalyq turaqtylyqty qoldaýǵa baǵyttalǵan daǵdarysqa qarsy sharalardy júzege asyrý úshin Úkimet 5,9 trln teńge bólgen.