Qazaqstan koronavırýsqa qarsy reseılik vaktsınany satyp ala ma

NUR-SULTAN. QazAqparat – Qazaqstan koronavırýsqa qarsy reseılik vaktsınany satyp ala ma? Bul saýalǵa QR DSM Taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary Nurlybek Asylbekov jaýap berdi, dep habarlaıdy QazAqparat tilshisi.

«Bizdiń taraptan kelissózder júrgizilip, satyp alý múmkindigi týraly kelisimge qol qoıyldy. Biraq, bul tek qana kelisim. Qazirgi ýaqytta klınıkalyq synaqtyń úshinshi fazasyn ótkizýdi kútip otyrmyz. Taıaýda ǵana Reseı Densaýlyq saqtaý mınıstrliginiń basshylyǵy qańtarǵa deıin synaqtyń úshinshi fazasyn ótkizetindigin jarııa etken bolatyn. Sondyqtan atalǵan klınıkalyq synaqtardy ótkizý, janama áserlerin, jas erekshelikterge baılanysty qoldanylýyn eskerý qajet. Sodan keıin vaktsına boıynsha sheshim qabyldanady. Bul máselede qazir biz tańdaý jasaý satysynda turmyz», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, eń bastysy vaktsınany der ýaqytynda alý bolyp otyr.

«Mundaı vaktsına alynǵannan keıin elimizde 2 mıllıonnnan astam adam egiledi. Eger durys bolsa, bul sandy 10-15 paıyzǵa arttyrýǵa bolady», - dedi Nurlybek Asylbekov.

Eske salaıyq, tamyz aıynyń sońynda QR Premer-Mınıstriniń orynbasary Roman Sklıar bastaǵan delegatsııa Reseıge jumys saparymen baryp, COVID-19-ǵa qarsy RF ǵalymdary ázirlegen vaktsınany satyp alý jáne qoldaný máselelerin talqylady.