Qazaqstan koronavırýsqa baılanysty qandaı áýe reısterin toqtatty

NUR-SULTAN. QazAqparat - 2020 jyldyń 3 naýryzynan bastap «Qazaqstannyń avıatsııalyq ákimshiligi» AQ bazasynda koronavırýsqa qatysty jaǵdaıdy baqylaýǵa baǵyttalǵan Ahýaldyq ortalyq jumys isteı bastady. Ortalyqta Qazaqstanǵa turaqty jáne turaqty emes áýe qatynastary bar elderde ınfektsııa juqtyrǵan adamdardyń statıstıkasyna baqylaý júrgiziledi, dep habarlaıdy QazAqparat tilshisi QR IIDM Azamattyq avıatsııa komıtetiniń baspasóz qyzmetine silteme jasap.

«Úkimet koronavırýstyń Qazaqstan aýmaǵyna taralýyna jol bermeý úshin sharalar qabyldaýda. 2020 jyldyń 1 naýryzynan bastap karantındik is-sharalar qoldanylatyn elderdiń tizbesiniń keńeıýine baılanysty sol elderden kelgen jolaýshylarǵa 4-shi kúsheıtý kezeńi engizildi», - dep habarlaıdy komıtetten.

Vedomstvo Qazaqstan men Qytaı arasyndaǵy barlyq turaqty reıs (aptasyna 34 reıs) 2020 jyldyń 3 aqpanynan bastap toqtatylǵanyn eske saldy. Sondaı-aq 2020 jyldyń 1 naýryzynan bastap Nur-Sultan – Seýl jáne Almaty – Seýl baǵyttary boıynsha turaqty reısterdiń sany aptasyna 9-dan 3 reıske deıin qysqartylǵan. «Eır Astana» áýe kompanııasynyń Nur-Sultan – Seýl baǵyty aptasyna 2-den 1 reıske deıin, Almaty – Seýl baǵyty boıynsha aptasyna 5-ten 1 reıske deıin jáne «Asiana Airlines» áýe kompanııasynyń reısi 2-den 1 reıske deıin shektelgen.

««Mahan Air» áýe kompanııasynyń Almaty – Tegeran baǵyty boıynsha reıster 1 naýryzdan bastap (aptasyna 1 reıs) toqtatyldy. Sondaı-aq, 5 naýryzdan bastap Nur-Cultan – Baký baǵyty toqtatylady. Almaty-Baký reısi 5-ten 1 reıske deıin («Eır Astana» 3-ten reıske 1 deıin, «Azerbaijan Airlines» 2-den 1 reıske deıin), Aqtaý — Baký reısi 7-den 1 reıske deıin (SCAT) shekteledi. «SCAT» áýe kompanııasynyń Nur-Sultan – Tokıo baǵyty 2-den 1 reıske deıin qysqardy», - dep habarlaıdy komıtetten.

Atalǵan reısterdiń toqtatylýyna baılanysty, 1 naýryzdan bastap joǵaryda kórsetilgen reısterge bıletteri bar jolaýshylar áýe bıletterdi satyp alý orny boıynsha aıyppulsyz jáne tolyq kólemde qaıtara alady.

Jolaýshylar áýe bıletterdi qaıtarý máselesi boıynsha keńes alý úshin «Qazaqstannyń avıatsııalyq ákimshiligi» AQ-ǵa - 8 (7172) 64 58 41 nómirine habarlasa alady. Jeli jumys kúnderi saǵat 9.00-dan 18.00-ge deıin qyzmet kórsetedi.