Qazaqstan qorǵanysqa arnalǵan ónimder eksportyn eki ese ulǵaıtty

Alqa májilisine Prezıdent kómekshisi - Qazaqstan Respýblıkasy Qaýipsizdik Keńesiniń hatshysy Vladımır Jumaqanov, QR Premer-Mınıstri Keńsesiniń ókilderi, Parlament depýtattary, Qorǵanys jáne aeroǵarysh ónerkásibi mınıstrliginiń jáne jáne basqa da memlekettik organdardyń, baǵynysty uıymdar men kásiporyndardyń basshylyǵy qatysty.

«Búgingi tańda mınıstrlik eldiń qorǵanysy men qaýipsizdigin tıimdi túrde iske asyrýǵa múmkindik beretin salanyń normatıvtik-quqyqtyq bazasyn qalyptastyrý jumystaryn júrgizip jatyr. Qorǵanystyń memlekettik tapsyrysyn qalyptastyrýdyń jańa mehanızmderin retteıtin jáne otandyq qorǵanys-ónerkásiptik keshenin (QÓK) qoldaý sharalaryn qarastyratyn «Qorǵanys ónerkásibi jáne memlekettik qorǵanystyq tapsyrys týraly» Zań jobasy QR Parlamentine qaraýǵa engizildi», - delingen baspasóz habarlamasynda. 

Atap aıtqanda, 2018 jyldan bastap Qorǵanys mınıstrliginiń qorǵanystyq tapsyrys bıýdjeti QR QAÓM-ǵa ótedi. Bul  áleýetti organdardy ózine tán emes fýnktsııalardan bosatady jáne qorǵanys-ónerkásiptik kesheni kásipornynyń damýyn qamtamasyz etedi.

Qorǵanys pen qaýipsizdikti qamtamasyz etý úshin memlekettiń jańa tehnologııalyq múmkindikterin qurýǵa baǵyttalǵan salanyń tujyrymdamalyq negizderi júzege asyrylýda.

Basqarýdyń jańa úlgisi negizinde salanyń keshendi damýyn anyqtaıtyn QAÓM-niń 2028 jylǵa deıingi Damý strategııasyn ázirleý júrgizilip jatyr.

Mınıstrliktiń basty jumys baǵyttary qataryna QR qorǵanys pen ulttyq qaýipsizdik salasyndaǵy máselelerdi sheshý úshin qarý-jaraqtyń jańa jáne perspektıvti túrlerin, tehnıkany óndirýdiń jáne qyzmetterdi kórsetýdiń tolyq tsıklin basqarý da jatady.

Budan basqa, Memleket basshysynyń tapsyrmasy boıynsha Qorǵanys-ónerkásiptik kesheniniń damý qory qurylýda. Bıyldan bastap Qor QÓK kásiporyndaryn qoldaýdyń tabysty mehanızmi retinde jumys atqarýy tıis.

Byltyrǵy jyly QR QAÓM-de Ǵylymı-tehnıkalyq keńes quryldy. Ol qorǵanys ónerkásibi, ǵarysh jáne kıberqaýipsizdik salasyndaǵy eń ozyq perspektıvti jobalardy tańdaýmen aınalysady.

Búgingi tańda 3,3 mlrd teńge somaǵa 19 perspektıvti joba iriktelip alyndy.

Budan bólek, Qarýly Kúshterdi qaıta qarýlandyrýdyń jáne qorǵanys-ónerkásiptik keshenin damytýdyń 2030 jylǵa deıingi Tujyrymdamasynyń jobasy ázirlendi.

Atalǵan qujatty qabyldaý otandyq kásiporyndardy áskerı jáne qosarly paıdalaný ónimderdiń zamanaýı túrlerin ıgerýge baǵyttaýǵa, sondaı-aq uzaq merzimdi kelisimsharttardy jasaýǵa, óndiristi josparlaýǵa jáne tehnologııalyq jańǵyrtýdy ótkizýge múmkindik beretin bolady.

QÓK kásiporyndary eń aldymen servıstik qyzmetterdiń tolyq spektrin ıgerý múmkindigin qarastyrýy tıis. Tehnıka men qural-jabdyqtardy óndirýmen qatar, satýdan keıingi qyzmetterdi kórsetý máselesi de óte mańyzdy. 

Bul sharalar QÓK kásiporyndarynyń tabys ákelýin joǵarylatýǵa baǵyttalǵan.  

Memleket basshynyń tapsyrmasyna sáıkes aldaǵy jyldary Qazaqstanda qorǵanys ónerkásibiniń 9 kásipornynda tehnologııalyq jańǵyrtý ótkiziletin bolady. Bul barlyq QÓK kásiporyndardyń 1/4 bóligin quraıdy.

Árbir kásiporyn boıynsha jańǵyrtýdyń jol kartasy qurastyrylady. Basty nazar eksporttyq potentsıaly bar perspektıvti ónimder túrlerin shyǵarý.

Jalpy alǵanda, statıstıka málimetteri boıynsha qorǵanys ónerkásibi óndirisiniń kólemi 2016 jylmen salystyrǵanda 14%-ǵa, 80 mlrd teńgege deıin ósti. Eksport eki ese, 16 mlrd teńgege deıin ósti.

Aǵymdaǵy jyly QR QAÓM mamandary ǵaryshtyq salanyń ınfraqurylymdyq damytý, ulttyq spýtnıktik toptamasyn jańartý, eksporttyq múmkindikterin keńeıtý, jobalardy kommertsııalaý jumystaryn jalǵastyratyn bolady.  

«Báıterek» jańa ekologııalyq qaýipsiz ǵaryshtyq zymyran keshenin qurý jobasy boıynsha Jol kartasyn júzege asyrý, sondaı-aq «Zenıt-M» ǴZK jerústi ǵaryshtyq ınfraqurylym obektilerin Reseı Federatsııasy jalǵa alǵan obektiler quramynan shyǵaryp, olardy Qazaqstan Respýblıkasyna berý boıynsha jumystar jalǵastyrylady.

«KazSat» spýtnıktik baılanys júıesiniń jáne Jerdi qashyqtyqtan zondtaý (JQZ) júıesiniń spýtnıkteri shtattyq rejimde qyzmet atqarýda jáne ekonomıka, qorǵanys pen ulttyq qaýipsizdik máseleleriniń sheshýin tabysty qamtamasyz etýde.

 2017 jyl ishinde «KazSat» júıesi 5 mlrd teńgeden astam kiris ákeldi jáne shetel spýtnıkterdiń resýrstaryn paıdalanýdy qysqartý arqyly 12 mlrd teńge somasyna ımport almastyrýdy qamtamasyz etti.

2017 jyly memlekettik organdar men uıymdaryna JQZ ǵaryshtyq júıesiniń kómegimen Jer ústiniń 11,5 mln sharshy km. kóleminde 1,2 mlrd teńge somaǵa ǵaryshtyq sýretter berildi. Sonymen birge, ımport almastyrý 12 mlrd teńgeden astam somany qurdy.

Ǵaryshtyq tehnologııalardy syrtqy naryqtarǵa ilgirletý máselesine aıryqsha kóńil bólinedi. Basty nazarda kórshi elderdiń naryqtary: Qyrǵyzstan, Ózbekstan, Tájikstan. Búgingi tańda bul elderde óz ǵaryshtyq baılanys júıeleri joq. 

Aqparattyq qaýipsizdik salasynda QR QAÓM byltyrǵy jyly memleketimizdiń aqparattyq (kıber) qaýipsizdik salasyn damytý boıynsha negizgi kontseptýaldy ádisterdi ázirledi.  

Memleket basshynyń tapsyrmasy boıynsha Kıberqaýipsizdik Tujyrymdamasy («Qazaqstan kıberqalqany») jáne ony iske asyrý boıynsha Іs-sharalar jospary ázirlendi. Aqparattyq-kommýnıkatsııalyq tehnologııalar jáne aqparattyq qaýipsizdikti qamtamasyz etý salalarynda Biryńǵaı talaptar qabyldandy. Infraqurylymnyń asa mańyzdy obektiler Tizimi qalyptastyryldy.

Kadrlardy daıyndaý úshin 2017 jyly «Aqparattyq qaýipsizdik júıeler» mamandyǵy boıynsha bólinetin granttar sany  60-tan 160-qa deıin kóbeıtildi. Atalǵan mamandardy daıyndaý úshin jyl saıyn 500 granttan bólý josparlanyp otyr.

 «Aqparat jáne kommýnıkatsııalar máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» QR Zańyna sáıkes bank júıesinde aqparattyq qaýipsizdikti baqylaý júıesi quryldy, memlekettik organdar arasynda quzyretter ajyratyldy, aqparattyq qaýipsizdikti qamtamasyz etý boıynsha jańa sýbektiler aıqyndaldy.

Alqa jınalysynyń sońynda mınıstrlik aldynda Memleket basshysy men QR Úkimetiniń tapsyrmalaryna sáıkes QR QAÓM qyzmetiniń barlyq baǵyttary boıynsha birqatar mindetter qoıyldy.