Qazaqstan Qorǵanys mınıstrligi 15 myńnan astam jasty áskerge shaqyrady

ASTANA. 1 naýryz. QazAqparat - QR Prezıdentiniń 2013 jylǵy 28 aqpandaǵy «Áskerı qyzmettiń belgilengen merzimin ótkergen merzimdi áskerı qyzmettegi áskerı qyzmetshilerdi zapasqa shyǵarý jáne Qazaqstan Respýblıkasynyń azamattaryn 2013 jyldyń sáýir-maýsymynda jáne qazan-jeltoqsanynda merzimdi áskerı qyzmetke kezekti shaqyrý týraly» Jarlyǵyna sáıkes

2013 jylǵy 1 sáýirde azamattardy merzimdi áskerı qyzmetke kóktemgi shaqyrý naýqany bastalady.

QR QM baspasóz qyzmetiniń málimetinshe, bıylǵy kóktemde 18-27 jas aralyǵyndaǵy 15 myńnan astam er-azamatty ásker qataryna shaqyrý josparlanyp otyr. Onyń ishinde QR Qorǵanys mınıstrliginiń áskerı bólimderine 7 myńǵa jýyq jas shaqyrylmaq. Qalǵan bozbalalar Respýblıkalyq ulannyń, ІІM Іshki áskerleriniń, UQK Shekara qyzmetiniń, sondaı-aq Tótenshe jaǵdaılar mınıstrliginiń áskerı bólimderine jiberiledi.

Sonymen qatar, merzimdi qyzmetin ótkergen 16 myńǵa jýyq áskerı qyzmetshini josparly túrde zapasqa shyǵarý sharalary da qosa júrgiziletin bolady.

2013 jylǵy kóktemgi áskerge shaqyrý sharalary qarsańynda QR Qorǵanys mınıstri azamattardy merzimdi áskerı qyzmetke shaqyrý týraly Keshendi jospardy bekitken bolatyn. Atalǵan qujat jastardy Qarýly Kúshter qataryna shaqyrý naýqanyn sapaly ótkizý jáne áskerı qyzmetti nasıhattaý maqsatynda jasalyp otyr.

Keshendi josparda medıtsınalyq kýálandyrý, ıdeologııalyq jáne psıhologııalyq jumystar, normatıvti-quqyqtyq qamtamasyz etý týraly is-sharalar keńinen qamtylǵan. Jospardy sapaly iske asyrý úshin áskerge shaqyrý naýqanyna daıyndyq jáne ony júrgizýge Qarýly Kúshterdiń barlyq qurylymdyq bólimsheleri tartylatyn bolady.