Qazaqstan Qorǵanys mınıstri ózin-ózi oqshaýlaý rejımine kóshti

NUR-SULTAN. QazAqparat – Máskeýde ótetin Ekinshi dúnıejúzilik soǵystaǵy Jeńistiń 75 jyldyǵyna arnalǵan is-sharalarǵa qatysýyna baılanysty qorǵanys vedomstvosynyń basshysy generel-leıtenant Nurlan Ermekbaev 11 maýsymnan bastap ózin-ózi oqshaýlaý rejımine kóshti, dep habarlaıdy atalǵan vedomstvonyń baspasóz qyzmeti.

Merekelik is-sharalarǵa Qazaqstan Qorǵanys mınıstri óziniń reseılik áriptesi armııa generaly Sergeı Shoıgýdyń shaqyrýymen barady.

Ózin-ózi oqshaýlaý boıynsha sharalar shet elderge barý tártibin, dárigerlerdiń usynystaryn, sondaı-aq sanıtarlyq-epıdemıologııalyq jaǵdaıdyń jaı-kúıin eskere otyryp qabyldandy.

Qorǵanys mınıstri jumys ornynda. Bul rette onyń qaramaǵyndaǵylarmen tikeleı baılanysy joq. Qorǵanys mınıstrligi men qarýly kúshter qyzmetine basshylyq etý telefon jáne beınekonferentsbaılanysy arqyly júzege asyrylady.

Ózin-ózi oqshaýlaý kezeńinde qorǵanys mınıstrimen qajetti dıagnostıkalyq is-sharalar júrgiziledi.

Ózin-ózi oqshaýlaý rejıminiń aıaqtalý kúni týraly sheshim aǵymdaǵy jaǵdaıdy eskere otyryp, Máskeýden oralǵannan keıin qabyldanady.