Qazaqstan Koreıamen medıtsına, AI jáne joǵary tehnologııalar boıynsha ǵylymı baılanysty nyǵaıtpaq
ASTANA. KAZINFORM - Búgin Seýl qalasynda QR Ǵylym jáne joǵary bilim mınıstri Saıasat Nurbek Seýl ulttyq ýnıversıtetiniń Býndandaǵy gospıtaliniń prezıdenti ári bas dırektory, professor Chon En Themen kezdesti, dep habarlaıdy QR Ǵylm jáne joǵary bilim mınıstrliginiń baspasóz qyzmeti.
Kezdesýde joǵary bilim, ǵylym jáne medıtsınalyq tehnologııalar salalaryndaǵy yntymaqtastyqtyń perspektıvaly baǵyttary, akademııalyq almasýdy damytý, birlesken ǵylymı zertteýler júrgizý jáne joǵary bilikti mamandar daıarlaý múmkindikteri talqylandy. Sondaı-aq medıtsına jáne medıtsınalyq tehnologııalar salasyndaǵy ózara is-qımyldy nyǵaıtýǵa, ǵylymı jobalardy damytýǵa, tájirıbe almasýǵa jáne akademııalyq utqyrlyqty keńeıtýge erekshe nazar aýdaryldy.
Mınıstr óz sózinde Seýl ulttyq ýnıversıtetiniń qazaqstandyq joǵary oqý oryndary men ǵylymı uıymdarmen akademııalyq almasý, ǵylymı-zertteý jumystary jáne bilim berý baǵdarlamalaryn iske asyrý baǵyttarynda yntymaqtastyq ornatqanyn atap ótti. Atap aıtqanda, ýnıversıtet ál-Farabı atyndaǵy Qazaq ulttyq ýnıversıtetimen jáne Nazarbayev University-men ózara baılanys ornatqan. Yntymaqtastyqtyń perspektıvaly baǵyttaryna medıtsınalyq, ınjenerlik jáne aqparattyq tehnologııalar, sondaı-aq koreıtaný salalary jatady.
Seýl ulttyq ýnıversıteti (SNU) – Koreıa Respýblıkasynyń jetekshi joǵary oqý oryndarynyń jáne ǵylymı-zertteý ortalyqtarynyń biri, sondaı-aq eldegi alǵashqy ulttyq ýnıversıtet. Ýnıversıtet 1946 jyly on memlekettik jáne jekemenshik oqý ornynyń birigýi nátıjesinde qurylǵan.
SNU halyqaralyq ýnıversıtetter reıtıngterinde turaqty túrde joǵary oryndardan kórinip keledi jáne qýatty ǵylymı-zertteý ınfraqurylymyna ıe. Ýnıversıtet quramynda bakalavrıat deńgeıinde bilim beretin 15 kolledj (fakýltet), Bas joǵary mektep jáne 12 mamandandyrylǵan kásibı joǵary mektep bar. Ǵylymı-zertteý bazasy 70-ten astam ınstıtýt pen ortalyqty qamtıdy.
Ýnıversıtet ekojúıesiniń mańyzdy bóligi – klınıkalyq qyzmet pen ǵylymı-zertteý jumystaryn ushtastyratyn Seýl ulttyq ýnıversıtetiniń medıtsınalyq ortalyǵy.
Mınıstr sondaı-aq Korea University prezıdenti Kım Don Vonmen kezdesti.
Kore ýnıversıteti – Koreıa Respýblıkasynyń eń kóne ári bedeldi jekemenshik zertteý ýnıversıtetteriniń biri. Kezdesý barysynda Saıasat Nurbek ýnıversıtettiń ınfraqurylymymen jáne kampýsymen tanysty.
Korea University 1905 jyly qurylǵan jáne búginde eldiń jetekshi joǵary oqý oryndarynyń biri sanalady. Ýnıversıtet quramynda bakalavrıat deńgeıinde bilim beretin 17 kolledj (fakýltet) jáne 24 joǵary mektep bar. Ýnıversıtettiń ǵylymı-zertteý ınfraqurylymyna 130-dan astam ınstıtýt pen ortalyq kiredi. Sondaı-aq ýnıversıtet quramynda, onyń ishinde Kore ýnıversıtetiniń medıtsınalyq ortalyǵy bar kóp salaly medıtsınalyq mekemeler jumys isteıdi.
Kezdesýde joǵary bilim men ǵylym salasyndaǵy yntymaqtastyqty odan ári damytý, akademııalyq almasýdy keńeıtý, birlesken ǵylymı-zertteý jobalaryn iske asyrý jáne kadr daıarlaýdyń basym baǵyttary boıynsha ózara is-qımyldy kúsheıtý máseleleri talqylandy.
Kore ýnıversıteti qazaqstandyq jetekshi joǵary oqý oryndarymen, onyń ishinde ál-Farabı atyndaǵy Qazaq ulttyq ýnıversıtetimen, L.N.Gýmılev atyndaǵy Eýrazııa ulttyq ýnıversıtetimen jáne KIMEP ýnıversıtetimen yntymaqtastyq ornatqan. Ózara is-qımyl akademııalyq almasý, ǵylymı zertteýler, koreıtaný, halyqaralyq qatynastar, bıznes jáne joǵary tehnologııalar baǵyttaryn qamtıdy.
-Bul kezdesýler Qazaqstannyń joǵary bilim jáne ǵylymı uıymdardyń Koreıa Respýblıkasynyń jetekshi ýnıversıtetterimen halyqaralyq seriktestigin keńeıtý jónindegi jumystyń jalǵasy boldy. Mundaı yntymaqtastyq akademııalyq utqyrlyqty damytýǵa, birlesken zertteýler júrgizýge, bilim men tehnologııalar transferin júzege asyrýǵa, sondaı-aq bolashaǵy zor baǵyttar boıynsha mamandar daıarlaýǵa jańa múmkindikter ashady,-delingen habarlamada.
Osyǵan deıin Qazaqstannyń Koreıadan jasandy ıntellekt pen «jasyl» energetıkaǵa ınvestıtsııa tartatyny týraly jazdyq.
