Qazaqstan Koreıamen birlesip kreatıvti ındýstrııany damytýy kerek - sarapshy
TAShKENT. KAZINFORM – Tashkentte Ortalyq Azııa elderi men Ońtústik Koreıanyń saıası analıtıkalyq ortalyqtarynyń alǵashqy forýmy ótti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ortalyq Azııa halyqaralyq ınstıtýtynda ótken basqosýda sarapshylar Ortalyq Azııa men Koreıanyń ekonomıkalyq múmkindikterin talqylap, yntymaqtastyqty arttyrý joldaryn saralady. Máselen, Qazaqstan strategııalyq zertteýler ınstıtýty kreatıvti ındýstrııa salasynda qalyptasýy múmkin yntymaqtastyqtyń mańyzyna toqtaldy.
«Qazir kreatıvti salada baılanysty odan ári damytýymyz kerek. Ońtústik Koreıa kıno jáne basqa da salalarda óziniń úlken tájirıbesin kórsetip otyr. Ol biz úshin paıdaly, tıisinshe búginniń ózinde jańa tolqyn qalyptasqanyn baıqaýǵa bolady. Bizdiń talantty jastarymyz da óziniń deńgeıin halyqaralyq arenada kórsetip jatyr», - dedi Qazaqstan strategııalyq zertteýler ınstıtýtynyń bólim basshysy Aıdar Qurmashev.
Budan bólek, mamandar ınstıtýtsıonaldyq ózgeristerge bet burý qajettigine toqtaldy. Sarapshylardyń paıymynsha, ol úshin parlamentaralyq yntymaqtastyqty damytý shart.
«Maqsatymyz – Koreıa Respýblıkasy prezıdentiniń Ortalyq Azııaǵa jasaǵan saparyn qorytyndylaý ǵana emes, keler jylǵy «C5+Koreıa» sammıtine daıyndyqty bastaý ári usynystardy ázirleý. Bul memleket bizdiń aımaqpen osydan 17 jyl buryn kópjaqty yntymaqtastyq ornatyp, «Ortalyq Azııa-Koreıa» formatyndaǵy kezdesýdi alǵash bolyp ótkizgen bolatyn. Keıin sol jolǵa basqa da memleketter tústi. Bul jaǵdaı bizge tikeleı sheteldik ınvestıtsııa tartýǵa sep bolady», - dedi Ortalyq Azııa halyqaralyq ınstıtýtynyń dırektory Javlon Vahabov.
Forým nátıjesinde boıynsha túrli deńgeıdegi usynystar ázirlendi. Ol bastamalar prezıdent jáne mınıstrler dárejesindegi kezdesýlerdiń hattamasyna engizilmek.
