Qazaqstan Koreıadan jasandy ıntellekt pen «jasyl» energetıkaǵa ınvestıtsııa tartpaq
ASTANA. KAZINFORM - Qazaqstan Respýblıkasy Syrtqy ister mınıstrliginiń Investıtsııalar komıtetiniń tóraǵasy Ardaq Zebeshev bastaǵan Qazaqstan delegatsııasy Koreıa Respýblıkasyna jumys saparymen baryp, onyń aıasynda iri kompanııalardyń, memlekettik ınstıtýttar men iskerlik qaýymdastyqtardyń basshylyǵymen birqatar kezdesýler ótkizdi.
QR Syrtqy ister mınıstrligi baspasóz qyzmetiniń habarlaýynsha, kezdesýler barysynda saýda-ekonomıkalyq yntymaqtastyqty keńeıtýge, koreı kapıtalyn jáne ozyq tehnologııalardy tartýǵa, sondaı-aq Qazaqstan ekonomıkasynyń basym salalarynda birlesken jobalardy iske asyrýǵa negizgi nazar aýdaryldy.
Koreı halyqaralyq saýda qaýymdastyǵynyń (KITA) halyqaralyq yntymaqtastyq jónindegi vıtse-prezıdenti Lı San Chjýnmen kezdesýde koreı kompanııalarynyń Qazaqstandaǵy ónerkásip, jasandy ıntellekt, «jasyl» energetıka jáne elektr kólikterin óndirý salalaryndaǵy ınvestıtsııalyq jobalaryn iske asyrýǵa járdemdesý sharalary qarastyryldy.
Korea Overseas Infrastructure & Urban Development Corporation (KIND) basshylyǵymen kezdesýde Alatau City-di damytý, Orta dálizdi jáne kólik-logıstıkalyq ınfraqurylymdy damytý salalaryndaǵy yntymaqtastyqtyń perspektıvalyq baǵyttary aıqyndaldy.
YPP Corporation kompanııasymen «jasyl» energetıka salasyndaǵy, onyń ishinde «jasyl» sýtegi men ammıak óndirý jobasyn iske asyrý máseleleri talqylandy.
Hyundai Engineering jáne LX International kompanııalarynyń basshylyǵymen ınfraqurylym, energetıka jáne munaı-gaz hımııasy, strategııalyq mańyzdy mıneraldar, logıstıka jáne joǵary tehnologııalar salalaryndaǵy jobalar qaraldy.
Koreı kompanııalaryn ındýstrııalyq jáne arnaıy ekonomıkalyq aımaqtardy damytýǵa tartý máselesine erekshe nazar aýdaryldy.
Sapar qorytyndysy boıynsha taraptar ınvestıtsııalyq yntymaqtastyqty odan ári keńeıtýge jáne Qazaqstan ekonomıkasynyń basym salalarynda birlesken jobalardy iske asyrýǵa múddelilikterin rastady.
Osyǵan deıin Qazaqstan men Ońtústik Koreıanyń kreatıvti ındýstrııany birge damytatyny týraly jazdyq.
