Qazaqstan-Koreıa qarym-qatynasy senim, syılastyq jáne pragmatızmge negizdelgen — mınıstr
ASTANA. KAZINFORM — Ózara yntymaqtastyq odan ári nyǵaıa beredi. Bul jóninde QR Ónerkásip jáne qurylys mınıstri Ersaıyn Naǵaspaev Qazaqstan-Koreıa birlesken komıssııasynyń saýda-ekonomıkalyq jáne ǵylymı-tehnıkalyq yntymaqtastyq boıynsha 11-otyrysynda málimdedi.
— Ekijaqty seriktestikti nyǵaıtýǵa turaqty qyzyǵýshylyǵyńyz úshin alǵys aıtamyn. Qazaqstan Koreıamen tyǵyz baılanysty joǵary baǵalaıdy. Bizdiń qarym-qatynasymyz senim, syılastyq jáne pragmatızmge negizdelgen. Yntymaqtastyqty damytýda ózara senim men joǵary deńgeıdegi turaqty dıalog mańyzdy ról oınaıdy. Qos eldiń memleket basshylarynyń qoldaýy men jiti nazarynyń arqasynda seriktestigimiz is júzindegi jańa mazmunmen tolyǵyp jatyr, — dedi ol.
Sonymen qatar, ol QR Prezıdenti Qasym-Jomart Toqaevtyń bıyl qyrkúıek aıynda Seýlge jasaıtyn sapary ekijaqty qarym-qatynasqa jańa serpin beretinin atap ótti.
Odan bólek, mınıstr mazmundy dıalog úkimetaralyq jáne vedomstvoaralyq deńgeıde jalǵasyp jatqanyna toqtaldy.
Onyń sózinshe, qos memlekettiń úkimetteri saýda-ekonomıkalyq, ınvestıtsııalyq jáne ǵylymı-tehnologııalyq salalarda seriktestikti kúsheıtý úshin naqty tapsyrmalardy oryndap jatyr.
Aıta keteıik, buǵan deıin Ońtústik Koreıadaǵy zańdy jumysqa el azamattary qashan bara alatynyn jazǵanbyz.
