Qazaqstan-Koreıa dostyǵyn nyǵaıtý eki eldiń ortaq maqsaty - Prezıdent

NUR-SULTAN. QazAqparat - Qazaqstan-Koreıa dostyǵy men tyǵyz seriktestigin nyǵaıtý elderimizdiń ortaq maqsaty. Bul týraly búgin Aqordada Koreıa Respýblıkasynyń Prezıdenti Mýn Chje Inmen kelissózderden keıingi birlesken málimdeme barysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Prezıdent Mýn Chje In bastaǵan ońtústikoreılik delegatsııany qazaq jerinde qabyldaý men úshin jáne barsha qazaq halqy úshin úlken mártebe. Bizdiń elimizge alǵash ret memlekettik saparmen kelgen Koreıa Respýblıkasynyń Prezıdenti Mýn Chje Inge úlken rızashylyǵymdy bildiremin. Qazaqstan men Ońtústik Koreıa arasyndaǵy dostyq pen tyǵyz seriktestikti damytý jáne odan ary nyǵaıtý elderimizdiń ortaq maqsaty. Búgingi sapar barysynda oǵan tolyq kózim jetti», - dedi QR Prezıdenti.

Memleket basshysy eki eldiń strategııalyq qarym-qatynastarynyń 10 jyldyǵyna oraı Mýn Chje In myrzanyń Nur-Sultan qalasyna kelýiniń máni men mańyzy erekshe ekendigin basa aıtty.

«Bul bizdiń uzaqmerzimdi yqpaldastyǵymyzdy tyń beleske shyǵardy. Qazaqstan men Ońtústik Koreıa ózara qarym-qatynas ornatqan ýaqyttan beri saıası yqpaldastyǵymyzdyń turaqty damýyn biz Elbasynyń atymen baılanystyramyz. Men Memleket basshysy retinde Tuńǵysh Prezıdentimizdiń saıasatymen sabaqtastyqty saqtap, strategııalyq áriptestigimizdi nyǵaıta túsýdi basty maqsatym ári muratym dep bilemin. Biz Ońtústik Koreıamen ózara senimge negizdelgen ashyq jáne syndarly qarym-qatynas ornattyq», - dedi Q.Toqaev.