Qazaqstan koreı áriptesterimen energetıkadaǵy yntymaqtastyqty keńeıtýge nıetti
ASTANA. KAZINFORM - Energetıka mınıstri Almasadam Sátqalıev bastaǵan Qazaqstan delegatsııacy Koreıa Respýblıkasyna resmı saparmen bardy. Bul týraly mınıstrliktiń baspasóz qyzmeti málimdedi.
Qazaqstan Energetıka mınıstrliginiń basshysy Koreıanyń iri energetıkalyq kompanııalarynyń ókilderimen jáne memlekettik organdarmen birqatar kezdesýler ótkizdi.
Koreıa Respýblıkasynyń Saýda, ónerkásip jáne energetıka mınıstri An Dok Kyn myrzamen kezdesýde atom salasyndaǵy yntymaqtastyq máseleleri talqylandy. Kezdesý barysynda Koreı tarapy AES salý máselesi boıynsha referendýmnyń sátti ótýimen quttyqtap, Qazaqstanda AES salý boıynsha koreı kompanııalarymen konsýltatsııalar ótkizýge qoldaý kórsetýge daıyn ekendigin bildirdi.
Sonymen qatar saýda, ónerkásip jáne energetıka mınıstrimen energetıka salasyndaǵy, onyń ishinde munaı-gaz salasyndaǵy áriptestik qatynastardy jáne jańartylatyn energııa kózderi salasyndaǵy jobalardy keńeıtý múmkindigi talqylandy. Sondaı-aq, Energetıka mınıstri «Doosan Enterbility», «Korea Hydro&Nuclear Power» (KHNP), «Korea Electric Power Corporation» (KEPCO), «Korea National Oil Corporation» (KNOC), «Samsung C&T» sııaqty iri koreı kompanııalarynyń ókilderimen kelissózder júrgizdi.
Energetıka mınıstri koreı kompanııalarynyń ókilderimen olardyń qazirgi ýaqytta Qazaqstanda AES salý jobasyn iske asyrýdyń yqtımal úlgileriniń biri retinde zerttelip jatqan halyqaralyq konsortsıýmǵa qatysýy týraly áńgimelesti. A.Sátqalıev bul másele boıynsha túpkilikti sheshim 2025 jyly qabyldanatynyn atap ótti.
«Doosan Enterbility» kompanııasynyń ókilderimen kelissózder qorytyndysy boıynsha Energetıka mınıstrligi men «Doosan Enterbility» arasynda ózara túsinistik týraly Memorandýmǵa qol qoıyldy.
Qujat aıasynda taraptar jergilikti personaldy daıarlaı otyryp, koreı kompanııasynyń energetıkalyq jabdyqtaryn óndirý, sondaı-aq Astana qalasynda zaýyt ókildigin ashý múmkindigin zertteıdi.
Qazirgi ýaqytta Qazaqstannyń«Doosan Enterbility»kompanııasymen yntymaqtastyǵy Túrkistan oblysynda qýaty 1000 MVt PMÝ bazasynda elektr stantsııasyn salý jobasy sheńberinde júzege asyrylyp jatyr. Sondaı-aq,«Doosan Enterbility» KEPCO KPS-pen birlesip, shyǵaryndylardy azaıtý jáne stantsııalardy paıdalaný merzimderin uzartý bóliginde Qazaqstannyń energokeshenin tehnıkalyq tekserýdi júzege asyrady.
Buǵan deıin Premer-mınıstrdiń orynbasary – Ulttyq ekonomıka mınıstri Nurlan Baıbazarov Qazaqstandaǵy AES qurylysyn qarjylandyrý shemasy týraly aıtyp berdi.
