Qazaqstan qor naryǵynyń astyrtyn tusy týraly fılm jaryqqa shyqty
Qazaqstandyq kınematografııa buryn-sońdy qarjy taqyrybyna bulaı tereń dendemegen. Alaıda, bas prodıýser Erbolat Baıǵanın, rejısser Elena Lısasına men stsenarıı avtory Dmıtrıı Bogomolov osynaý batyl tájirıbege bara otyryp, múlt ketpepti. Fılmniń tusaýkeserine kelgen barlyq kórermen týyndyǵa joǵary baǵa berip jatyr. Taqyrypqa tereń boılaı bilýdiń qupııasy qarapaıym - Erbolat Baıǵanın 1993-1994 jyldary Almaty qarjy bırjasy prezıdentiniń kómekshisi qyzmetin atqaryp, keıin qor naryǵynda eńbek etkendikten, bıznestiń qyr-syryn bir kisideı biledi.
«Shyntýaıtynda, meniń mamandyǵym - qarjyger. Mine, sondyqtan osy fılmdi jaryqqa shyǵarýdy uıǵardym. Biz shynynda da «Ýoll-strıt» fılmine baǵyt-baǵdar ustandyq ta, jap-jaqsy týyndyny dúnıege ákelý qolymyzdan kelgen sekildi. Biz osy taqyrypqa jaqyndaı otyryp, qazaqstandyq erekshelikti de kórsetkimiz keldi. Ózimniń jeke tájirıbeme kóp súıengendikten, fılmdi shynaıy oqıǵalarǵa negizdelgen dep aıtýǵa ábden bolady», - deıdi Baıǵanın tusaýkeserden keıin.
Sıýjettiń ortasynda - Taıyr men Rýslan atty synyptastardyń ómirbaıany. Sonaý 1996 jyly Rýslan matematıkadan kileń beske oqyǵanymen, barlyq botanıkter sekildi búkil úı jumystaryn saǵyzǵa bola atqara beredi. Al Taıyr bolsa, «myqtylardyń» qatarynda bolady da, Rýslanǵa eshkimdi tıiskizbeı, qorǵan bolady.
Arada kóp jyl ótkennen keıin Taıyr brokerlik keńsege jetekshilik etip, onyń eden jýýshysy Rýslannan kóp aqsha tabady. Kúnderdiń kúninde ómirden ádilettilik izdep, tappaǵan Rýslan aqyry Taıyrdyń keńsesine jumysqa turady. Rýslan endi ǵana eńsesin kóterip, jumysty adal atqarǵysy kelse, bul jerdegi júıeniń óz zańdylyǵy bar bolyp shyǵady.
Baıǵanın moıyndaǵandaı, «Qarjyger. Táýekel oıyny» kınojobasy - tolyq metrajdy oıynǵa negizdelgen fılm ári shyǵarmashylyq týyndy.
Fılmde basty rólderdi Asylhan Tólepov, Shyńǵys Qapın, Karına Jumalıeva, Aldabek Shalbaev, Baqytjan Álpeıisov, Erbolat Baıǵanın jáne Fılıpp Voloshın somdaıdy. 
Qazirgi ýaqytta atalmysh týyndyny kınofestıvalderge joldap, sheteldegi prokatqa shyǵarý kózdelgen.