Qazaqstan qor naryǵynda Ksell men KEGOC aktsııalarynyń quny tómendedi

ALMATY. QazAqparat - Qarasha aıynda Qazaqstannyń qor naryǵynda «Ksell», «KEGOC» jáne «KAZ Minerals PLC» kompanııalarynyń aktsııalary tómendep ketti. Bul týraly Qazaqstan Qor bırjasy málim etti, dep habarlaıdy QazAqparat tilshisi.

«Ksell» AQ-nyń aktsııasy qarasha aıynda 5,24 paıyzǵa tómendep, 1 721,8 teńgege deıin tústi.

«Uıaly baılanys operatorynyń qundy qaǵazdary boıynsha baǵalardy turaqtandyrý áreketi qyrkúıek aıyndaǵy qarbalastan keıin áli turaqtalǵan joq. Eki aı burynǵy qarbalas «kompanııany búgingi ıesi TeliaSoneradan Túrkııanyń telekommýnıkatsııa alyby - «Turkcellý» kompanııasy satyp alady» degen aqparatty alypsatarlardyń utymdy paıdalanǵysy kelgen oıynynan keıin bastalǵan bolatyn. Degenmen, birinshiden, kompanııada shyǵyn óte kóp emes. Sebebi, aktsııalar óte belsendi satyldy. Sondyqtan, bul arada negizinen, baǵalarǵa túzetý engizý jumystary júrgizilip jatyr dese bolady», - dep túsindirdi Qazaqstan Qor bırjasynyń tóraǵa orynbasary Andreı Tsalıýk.

Osyǵan uqsas jaǵdaı KAZ Minerals PLC ( - 4,80%) jáne «KEGOC» AQ-da (- 4,79%) baıqaldy.

Al qarasha aıyndaǵy qundy qaǵazdary joǵarylaǵan «QazMunaıgaz» AQ boldy. Onyń qundy qaǵazdary 10,2 paıyzǵa artyp, 22 270 teńgege jetti. 

KASE málimetterine súıensek, Qazaqstan Qor bırjasynyń qarasha aıyndaǵy birikken saýda kórsetkishi qazan aıyndaǵy baǵamen salystyrǵanda 6,5 paıyzǵa nemese 708,1 mlrd teńgege azaıyp, 10 246 mlrd teńgeni qurap otyr.