Qazaqstan qor bırjasynda tsıfrlyq teńge qoldanylýy múmkin

ALMATY. KAZINFORM – KASE tóraǵasy Ádil Muhamedjanov tsıfrlyq qarjy naryǵy týraly óz oıyn aıtty.

Onyń aıtýynsha, qazir Ulttyq bank jáne naryq qatysýshylary birlese otyryp «Tsıfrlyq qarjy aktıvteri týraly» zańdy qabyldaýǵa jaqyn tur.

– Meniń oıymsha, Qazaqstan qor bırjasy jańa tsıfrlyq álemde úlken orynǵa ıe bola alady. Biz Ortalyq depozıtarıımen birlesip, jańa naryqqa qatysý úshin ózara árekettesý qurylymyn uıymdastyryp jatyrmyz, - dedi Ádil Muhamedjanov.

Ol tsıfrlyq aktıvter naryǵynyń keńeıip, tanymal ári tartymdy ınvestıtsııalyq baǵytqa aınalyp kele jatqanyn atap ótti. KASE bul salada belsendi jumys isteýge nıetti.

– Bul – ári bólek qural, ári jeke platforma. Árıne, qazirgi júıege bul aktıvterdi qalaı biriktirýge bolatynyn oılastyrýǵa bolady. Biraq tsıfrlyq qarjy aktıvteriniń aınalymyna arnalǵan jeke sektorlardy qurý ońaıyraq bolmaq. Sonda jańa quraldar da paıda bolady, - dedi ol.

Sonymen qatar bırja tóraǵasy zań men oǵan sáıkes normatıvtik quqyqtyq aktiler qabyldanǵannan keıin ǵana barlyq qurylym men jumys tetikteri naqty aıqyndalatynyn atap ótti. Al BAQ ókilderiniń «Tsıfrlyq teńge bırjada saýdalana ma?» degen suraǵyna Ádil Muhamedjanov mundaı múmkindikti joqqa shyǵarmaıtynyn aıtty.

Eske salaıyq, buǵan deıin 1 tamyzdan bastap Qazaqstannan keletin barlyq taýarǵa AQSh-tyń 25% baj salyǵyn engizýine baılanysty Qazaqstan qor bırjasynyń (KASE) basqarma tóraǵasy Ádil Muhamedjanov pikir bildirdi.