Qazaqstan qor bırjasynda endi arab dırhamymen de saýda jasaýǵa bolady

ALMATY. KAZINFORM – Búginnen bastap Qazaqstan qor bırjasy (KASE) valıýta naryǵyndaǵy quraldar tizbegin keńeıtip, arab dırhamy qatysatyn saýda-sattyqty iske qosty.

Endi naryqqa qatysýshylar AED/KZT (arab dırhamynyń teńgege shaqqandaǵy baǵamy) jáne USD/AED (AQSh dollarynyń dırhamǵa shaqqandaǵy baǵamy) juptary boıynsha operatsııalar júrgize alady. Mámileler esep aıyrysýdyń birneshe merzimi boıynsha júzege asyrylady:

T+0 (TOD) — esep aıyrysý mámile jasalǵan kúni oryndalady;

T+1 (TOM) — esep aıyrysý kelesi jumys kúni oryndalady;

T+2 (SPT) — esep aıyrysý eki jumys kúninen keıin oryndalady.

KASE ókilderi valıýtalyq quraldar tizbegin keńeıtý naryq qarqyndylyǵyn arttyrýǵa, quraldardy ártaraptandyrýǵa jáne qatysýshylar úshin valıýtalyq táýekelderdi basqarýda qosymsha múmkindikter jasaýǵa baǵyttalǵanyn atap ótti.

Eske salaıyq, buǵan deıin áıgili Alibaba baǵaly qaǵazdary Qazaqstan bırjasynda saýdaǵa shyqty.