Qazaqstan kópvektorly, beıbitsúıgish syrtqy saıası baǵytyn saqtaıdy - QR SІM
2019 jylǵy 19 naýryzda Qazaqstan Respýblıkasynyń Prezıdenti Nursultan Nazarbaev Memleket basshysynyń ókilettigin toqtatý týraly halyqqa tarıhı úndeý jasap, tıisti Jarlyqqa qol qoıdy.
20 naýryzda Qazaqstan Respýblıkasynyń Konstıtýtsııasyna sáıkes Prezıdent ókilettiligi Parlament Senatynyń Tóraǵasy Qasym-Jomart Toqaevqa ótti. Qazaqstan Respýblıkasynyń Tuńǵysh Prezıdenti N. Nazarbaev Qaýipsizdik Keńesiniń tóraǵasy, Qazaqstan halqy Assambleıasynyń Tóraǵasy «Nur Otan» partııasynyń tóraǵasy jáne Konstıtýtsııalyq Keńestiń múshesi bolyp qalady.
Qazaqstannyń qazirgi zamanǵy saıası júıesi bıliktiń, memlekettiń saıası jáne ekonomıkalyq damýynyń tolyq sabaqtastyǵyn qamtamasyz etedi. Birinshi kezekte azamattardyń ál-aýqaty men ómir súrý sapasyn arttyrýǵa, zańnyń ústemdigi men damýynyń demokratııalyq modeli negizinde azamattyq qoǵam ınstıtýttaryn kúsheıtýge baǵyttalǵan tynys-tirshiliktiń barlyq salalaryn jańǵyrtý jalǵastyrylatyn bolady. Memleket Qazaqstandaǵy ınvestıtsııalyq ahýaldy jaqsartý jónindegi, onyń ishinde sheteldik bıznes áriptesterdiń quqyqtary men múddelerin qorǵaý jónindegi sharalardy jalǵastyrady.
Tuńǵysh Prezıdent Qazaqstan Respýblıkasynyń 2050 jylǵa deıingi Damý Strategııasynda eldiń odan ári ilgerileýiniń kókjıegi men parametrlerin aıqyndady. Maqsaty - álemniń eń damyǵan 30 memleketiniń qataryna kirý.
Strategııalyq kózqaras N. Nazarbaev álemdik arenadaǵy elimizdiń qazirgi kelbetin aıqyndap, Qazaqstannyń halyqaralyq qatynastar júıesindegi biregeı sýbektiligin bekitti.
N. Nazarbaevtyń iske asyrylǵan aýqymdy mindetter men jasampaz halyqaralyq bastamalary memlekettiń egemendigi men aýmaqtyq tutastyǵynyń berik kepili, bizdiń qoǵamnyń uzaq merzimdi tarıhı perspektıvaǵa qaýipsiz jáne turaqty damýy úshin negiz boldy.
Qazaqstannyń Tuńǵysh Prezıdenti jahandyq ıadrolyq qarýǵa qarsy qozǵalystyń, Eýrazııadaǵy ıntegratsııalyq protsesterdiń tanymal kóshbasshysy bolyp tabylady. Onyń bastamasy boıynsha qazirgi zamanǵy halyqaralyq qatynastardaǵy senim ahýalyn qalpyna keltirýge baǵyttalǵan biregeı dıalog alańdary - Azııadaǵy ózara is-qımyl jáne senim sharalary keńesi, Álemdik jáne dástúrli dinder kóshbasshylarynyń Sezi jáne t.b. quryldy.
Qazaqstan barlyq halyqaralyq mindettemelerdi saqtaı otyryp, kóp vektorly, teńgerimdilik jáne pragmatızm qaǵıdattaryna negizdelgen beıbitsúıgish syrtqy saıası baǵytty saqtaıdy. Álemdik qoǵamdastyqtyń barlyq elderimen qarym-qatynas ózara syılastyq, teń quqylyq jáne bir-biriniń múddelerin esepke alý negizinde qurylady.
Qazaqstan Respýblıkasynyń jańa Prezıdenti óz qyzmetin Qazaqstan Respýblıkasynyń Konstıtýtsııasyna jáne basqa da zańdaryna sáıkes quratyn bolady.