Qazaqstan kóptegen shetel azamattary qurmetpen qaraıtyn, yqpaldy memleketke aınaldy — Prezıdent
ASTANA. KAZINFORM — Qazaq tili barlyq salada, sonyń ishinde kreatıvti ındýstrııa salasynda keń qoldanys tapty. Tól tilimiz ultty uıystyratyn, órkenıetimizdiń órisin keńeıtetin «jumsaq kúshke» aınalýda. Bul pikirdi Memleket basshysy Qasym-Jomart Toqaev «Qazaq tili» qoǵamynyń H quryltaıynda aıtty.
Prezıdenttiń aıtýynsha, ana tilimizde jaryq kórgen kitaptardyń, ánderdiń, fılmderdiń naryqtaǵy úlesi ulǵaıa tústi.
— Mysaly, byltyr baspadan shyqqan 6 myńnan astam kitaptyń 70 paıyzy qazaq tilinde basyldy. Al bıyl Qazaqstanda túsirilgen 71 fılmniń 63-i ana tilimizde jaryqqa shyqty. Aıtylǵan derekterdiń bári jurtymyzdyń arasynda qazaq tiline úlken suranys týdyrdy. Bul — óte qýanyshty jaıt, jaqsy úrdis. Osyndaı jumysty kúsheıte berýimiz kerek, — dedi Memleket basshysy.
Sondaı-aq tól tilimiz ultty uıystyratyn, órkenıetimizdiń órisin keńeıtetin «jumsaq kúshke» aınalýda. Mysaly, álemge áıgili tarıhı tulǵa Beıbarys sultannyń, uly oıshyl Abaıdyń, asa kórnekti ǵalym Qanysh Sátbaevtyń ult órkenıetindegi orny men eńbegi biregeı.
— Al, búginde jahan jurtynyń súıikti ánshisine aınalǵan Dımash Qudaıbergen, áıgili Kann festıvalinde úzdik aktrısa dep tanylǵan Samal Eslıamova, belgili shahmatshy, álemniń birneshe dúrkin chempıony Bıbisara Asaýbaeva, búkil japon halqyna, sonyń ishinde ımperatorǵa da óte tanymal, kásibı sýmoda júrgen jalǵyz qazaq balýany, jeńimpaz Ersin Baltaǵul (Kımbozan Harýkı) jáne Higgsfield AI jahandyq startap jetekshisi Erzat Dýlatov sııaqty naǵyz daryn ıeleri qazaqtyń mádenıetin, rýhanııatyn, zııatkerlik qýatyn jan-jaqty dáriptep júr, — dedi Q. Toqaev.
Bul azamattardy elimizdiń naǵyz otanshyl perzentteri ári rýhanı elshileri dese, artyq bolmaıdy.
— Qazir Qazaqstan kóptegen shetel adamdary qurmetpen qaraıtyn, yqpaldy memleketke aınaldy. Sondyqtan biz qazaq tiliniń bolashaǵyna qatysty teris kózqarastan aýlaq bolýymyz kerek. Tilimizdiń taǵdyry kúmándi, belgisiz dep zarlaı bersek, ózge elder men halyqtar bizge qalaı qaraıdy, qalaı senedi?! Únemi túńile berý oń nátıje ákelmeıdi, mundaı áńgimeni doǵaratyn kez kelgenine kózimiz ábden jetti, — dedi Qasym-Jomart Toqaev.
Aıta keteıik, Memleket basshysy Qasym-Jomart Toqaev Halyqaralyq «Qazaq tili» qoǵamynyń H quryltaıynda sóz sóılep jatyr.
Prezıdent qazaq tiliniń abyroı-bedelin arttyrý úshin tabandy jumys isteý kerektigin aıtýda.
Jańa Konstıtýtsııada «Táýelsizdik» jáne «Egemendik» sózderin bas árippen jazylatyn boldy.
