Qazaqstan kópirlerdi tsıfrlyq basqarýdyń eýropalyq tájirıbesin engizbek
ASTANA. KAZINFORM - «Qazaqstan jol ǵylymı-zertteý ınstıtýty» AQ mamandary Instıtýt ázirlegen Kópirlerdi paıdalanýdy basqarý júıesin (KPBJ) odan ári damytý maqsatynda Eýropanyń kópir qurylystaryn basqarý salasyndaǵy ozyq tájirıbesin zerdeledi.
QR Kólik mınıstrligi baspasóz qyzmetiniń habarlaýynsha, 20-24 shilde aralyǵynda Instıtýt mamandary Italııada Franchetti S.p.A. kompanııasy uıymdastyrǵan Bridge Management and Repair baǵdarlamasy boıynsha oqýdan ótti.
Oqý barysynda qatysýshylar kópir qurylystaryn olardyń búkil ómirlik tsıkli boıynda basqarýdyń zamanaýı tásilderimen tanysty.
Atap aıtqanda, tekserý men dıagnostıkadan bastap monıtorıng, jóndeý jáne rekonstrýktsııalaýǵa deıingi protsester qamtyldy. Sondaı-aq tsıfrlyq pasporttardy, BIM-modelderdi, tsıfrlyq kóshirmelerdi, aspaptyq monıtorıng júıelerin qoldanýǵa jáne jóndeý jumystaryn táýekelge negizdelgen josparlaý tásilderine erekshe nazar aýdaryldy.
Álemdik tájirıbe qazirgi zamanǵy kópirlerdi basqarý júıesi aqaýlar paıda bolǵannan keıin olardyń saldaryn joıýǵa emes, olardy aldyn ala boljaýǵa jáne ýaqtyly anyqtaýǵa negizdelýi tıis ekenin kórsetedi. Búginde jetekshi memleketter merzimdik tekserýlerden kópir qurylystarynyń tehnıkalyq jaı-kúıi men táýekel deńgeıin baǵalaýǵa negizdelgen úzdiksiz tsıfrlyq basqarý júıesine kóship jatyr.
-Alynǵan tájirıbe QazjolǴZI ázirlegen Kópirlerdi paıdalanýdy basqarý júıesin odan ári jetildirýge paıdalanylatyn bolady. Bizdiń maqsatymyz júıeni tsıfrlyq derekter bazasynan kópir aktıvterin basqarýdyń tolyqqandy quralyna aınaldyrý. Bul júıe táýekelderdi obektıvti baǵalaýǵa, qurylystardyń tehnıkalyq jaı-kúıin boljaýǵa jáne jóndeý jumystarynyń basymdyqtaryn aıqyndaýǵa múmkindik beredi, – deıdi ınstıtýttyń basqarýshy dırektory Andreı Chjen.
KPBJ-ni damytý elimizdegi barlyq kópir qurylystary týraly málimetterdi, onyń ishinde tehnıkalyq sıpattamalaryn, tekserý nátıjelerin, jóndeý tarıhyn jáne monıtorıng derekterin biryńǵaı tsıfrlyq júıege biriktirýge múmkindik beredi. Sonyń nátıjesinde jóndeý jumystary ınjenerlik derekter negizinde josparlanyp, jasandy qurylystardy paıdalanýdyń qaýipsizdigi artyp, bıýdjet qarajatyn tıimdi josparlaý qamtamasyz etiledi.
Alynǵan bilim men halyqaralyq tájirıbe Qazaqstan Respýblıkasyndaǵy kópir qurylystaryn qalpyna keltirýdiń keshendi baǵdarlamasyn ázirleýge negiz bolmaq.
Osyǵan deıin habarlaǵanymyzdaı, Qazaqstan kópir qurylystaryn jobalaýda álemdik ozyq tájirıbeni engizbek.
